O‘zbekiston milliy terma jamoasining Qatar va KXDRga qarshi uchrashuvlarida ishlaydigan hakamlar nomi maʼlum bo‘ldi.
Noyabr oyida 2026-yilgi Jahon chempionati 3-saralash bosqichi doirasida Qatar va KXDR terma jamoalariga qarshi safar uchrashuvlarida ishtirok etadi. Osiyo futbol konfederatsiyasi mazkur bahslarda ishlaydigan hakamlar haqida maʼlum qildi.
Unga ko‘ra, Qatar — O‘zbekiston uchrashuvida koreyalik hakamlar brigadasi faoliyat olib boradi. Bosh hakam sifatida Kim Jonghyok, unga qanotlarda yurtdoshlari Park Kyunyong va Jang Jongpil yordam beradi. To‘rtinchi rasmiy hakam sifatida Chae Sanghyop ishlaydi. VAR hakami bo‘lib Kim Hegon faoliyat olib boradi.
Ma’lumot uchun, uchrashuv 14-noyabr Toshkent vaqti bilan 21:15 da “Jassim bin Hamad” stadionida start oladi.
KXDRga qarshi uchrashuv Laos poytxati Vyentyan shahrida o‘tkaziladi. Mazkur o‘yinda kuvaytlik hakamlar brigadasi ishlaydi. Bosh hakam — Ali Ali Ahmad, unga yurtdoshlari Alanezi Abdulhadi va Abbos Ahmad yordam beradi. To‘rtinchi rasmiy hakam sifatida Ammar Ashkanani ishlaydi. VARda esa Abulloh Jamali faoliyat olib boradi.
KXDR — O‘zbekiston uchrashuvi 19-noyabr Toshkent vaqti bilan 17:00 da “Lao” stadionida boshlanadi.
Izoh (0)