Qurilish obyektini tashqi muhandislik-kommunikatsiya tarmoqlariga ulash mumkin bo‘lgan quvvatlar to‘g‘risidagi ma’lumotlar batafsil yoritilmaganligi yoki kommunikatsiya tarmoqlari mavjud emasligi natijasida auksion savdolariga chiqarilgan yer uchastkalari bir necha bor takroran savdolarga qo‘yilayotganligi ma’lum bo‘ldi. Bu haqda Makroiqtisodiy va hududiy tadqiqotlar instituti xabar bermoqda.
Tadqiqotga ko‘ra, aksariyat tumanlarda yer uchastkalarini ijaraga berishdan tushgan mablag‘lar joriy yilning yanvar-sentyabr oylarida o‘tgan 2023-yilning shu davridagiga nisbatan ortgan. Natijada yer auksionlarida 1,9 trln so‘mlik bo‘sh yer maydonlari sotilib, uning ma’lum qismi mahalliy byudjetga yo‘naltirilgan.
Respublikadagi 67 ta tuman (shahar)da mulk huquqi asosida yer uchastkalari auksion savdolariga umuman chiqarilmagan.
Tadqiqot mualliflari auksion savdolarini yanada takomillashtirish hamda rasmiy yer bozorining qamrovini kengaytirishda urbanizatsiyani hisobga olishni taklif qilgan:
- hududlarning iqtisodiy rivojlanish dasturlari, tasdiqlangan shaharsozlik hujjatlari hamda urbanizatsiya jarayonlarini (o‘sish nuqtalari) chuqur tahlil qilgan holda, infratuzilma mavjud bo‘lgan yerlarni auksion savdolariga chiqarish;
- 2022-yildan hozirgi kunga qadar auksion savdolariga chiqarilib, hanuzgacha sotilmasdan turgan barcha lotlarni (aksariyat lotlar tuman markazida joylashgan) auksion savdolaridan chiqarib ularni birlashtirib, jozibador bo‘lgan loyihalarni ishga tushirish uchun yerdan foydalanish maqsadini belgilab, ijara huquqi bilan qayta savdolarga chiqarish choralarini ko‘rish lozim.
Qo‘shimcha qilinishicha, “Yerelektron” AATga kiritilayotgan bo‘sh yer uchastkalari bo‘yicha takliflarni rad etish asoslarini qayta ko‘rib chiqish kerak.
Izoh (0)