Xonanda Tarkan bir paytlar zallarni energiya bilan to‘ldirgan ajoyib iste’dodi bilan mashhur edi. U o‘z ona tili — turk tilidagi qo‘shiqlari bilan butun dunyoga tanilgan va shuhrat qozongan yagona turkiyalik xonanda bo‘ldi. Ayniqsa, 2000-yillarda Tarkan butun dunyo bo‘ylab stadionlarni to‘ldirib, barcha mamlakatlarning musiqiy chartlarida yetakchilik qilgan.
Musiqa olamiga kirib kelishi
Tarkan bolaligidanoq katta sahnaga chiqishni va mashhurlikka erishishni istagan. U Elvis Preslining ashaddiy muxlisi bo‘lgan. O‘smirlik davrida u Preslining plakatlariga qarab, mikrofon bilan sahnaga chiqishni va tomoshabinlarning olqishlaridan bahramand bo‘lib, katta auditoriya oldida qo‘shiq aytishni tasavvur qilar edi.
Tarkan o‘z maqsadiga erishish uchun ko‘p mehnat qildi: u avval musiqa maktabini, keyin musiqa akademiyasini tugatdi. Boshlang‘ich daromad olish va tajriba orrtirish uchun to‘ylarda qo‘shiq aytdi.
Prodyuser Mehmet Soyutoulu bilan tanishganidan keyin esa hammasi o‘zgardi va u Tarkanda istiqbolli, iste’dodli va xarizmatik yigitni ko‘rib, unga “Yine sensiz” albomini chiqarishga yordam berdi. 1992-yilda ilk plastinkasini taqdim qilgan yosh yulduz oradan ko‘p o‘tmay ikkinchisini ham omma e’tiboriga havola etdi. 1999-yilda uning “Şıkıdım” (“Shikidim”) qo‘shig‘i mega hitga aylandi. Bu vaqtga kelib xonanda nafaqat Turkiyada, balki boshqa davlatlarda ham mashhur bo‘la boshladi.
Tarkan o‘zining ko‘p yillik ijodi davomida:
- 11 ta albom chiqardi;
- 19 milliondan ortiq plastinkalar sotdi;
- nufuzli “The World Music Awards” mukofotini oldi (Tarkan bu mukofotni olgan tarixidagi yagona turk qo‘shiqchisi);
- U raqsbop pop musiqasi janrida sharqona ruhga ega qo‘shiqlarni chiqardi.
Advokat bilan munosabatlari
2001-yilda Tarkanga noma’lum shaxslar uni obro‘sizlantiradigan fotosuratlarni tarqatib yuborish bilan tahdid qilib, katta pul talab qildi. Shantajchi hibsga olingan bo‘lsa-da, Tarkanning suratlari matbuotga tarqalib ketdi va uning obro‘siga putur yetkazdi. So‘ng xonanda advokat yordamidan foydalanishga majbur bo‘ldi. O‘sha paytda karyerasini endigina boshlagan Bilge O‘zturk ko‘ngilli ravishda xonandani himoya qildi. Shu tariqa 7 yil davom etgan munosabatlar boshlandi.
Intervyulardan birida Tarkan Bilge bilan munosabatlaridan shunchaki zavqlanishini va kelajak uchun hech qanday rejalar tuzmasligini tan olgan. Xonandaga Bilgening boshqa ayollar kabi shart qo‘ymasligi va turli savollar bilan bezovta qilmasligi yoqar edi. 2008-yilda ushbu munosabatlarga nuqta qo‘ygan Tarkan uning eng katta orzusi oila qurish va ota bo‘lish ekanini bildirgan.
Muxlis bilan turmush qurish
Tarkan advokati bilan ajrashganidan keyin shaxsiy hayotini yaxshilashga intilmadi. U jufti mabodo homilador bo‘lib qolsagina, unga uylanishi mumkinligi haqida aytar edi. Xonandaning to‘yi haqidagi xabarlar esa uning muxlislari uchun katta syurpriz bo‘ldi.
Tarkan 2016-yilning bahorida o‘zining muxlisi Pinar Dilek bilan turmush qurdi. Kelin Tarkan kabi Germaniyada tug‘ilgan va bolaligidanoq xonandaning ijodiga qiziqqan. Insayderlarning so‘zlariga ko‘ra, Pinar konsertdan keyin Tarkanning kiyinish xonasiga yashirincha kirib, u bilan tanishishga harakat qilgan. Ular munosabatlarini rasman qonuniylashtirishdan oldin 5 yil davomida uchrashib yurgan.
Darhaqiqat, Tarkan uylanayotgan vaqtda xonanda avvallari aytgani kabi kelin homilador emas edi. Ular ikki yildan keyingina farzandli bo‘lgan.
Uzoq kutilgan otalik va oilaviy hayot
Er-xotin 2018-yilning yozida birinchi marta ota-ona bo‘lishdi. Yangi chaqaloqqa Liya degan ism qo‘yishdi. Bu vaqtda xonanda 46 yoshda, rafiqasi 30 dan oshgan edi. Turmush o‘rtoqlar o‘rtasidagi yosh farqi noma’lum. Ba’zi ma’lumotlarga ko‘ra, er-xotinlar yoshi orasida 15 yil farq bor.
Tarkan va Pinar hozirda baxtli yashamoqda va qizi tarbiyasi bilan shug‘ullanmoqda. Xonandaning talabiga ko‘ra, uning rafiqasi Pinar Dilek ijtimoiy tarmoqlarda o‘z sahifasiga ega emas. Tarkanning o‘zi esa faqat ba’zida arxiv suratlari bilan bo‘lishib turadi. Xonanda avvalgi mashhurligini qaytarishga harakat qilmaydi.
Tarkan hozirda ham turli qo‘shiqlar yozadi, kuylar yaratadi. Ammo gastrol safarlariga faqat Turkiya bo‘ylab chiqadi. So‘nggi yillarda Tarkan ijtimoiy faol bo‘lib, ekologiya va atrof-muhitni asrash harakatlarida ishtirok etmoqda va turli xayriya ishlarni amalga oshirib kelmoqda.
Izoh (0)