“Yangi ‘O‘tkan kunlarʼda suratga tushganim xatoyim bo‘ldi”. Gulchehra Jamilova to‘ychi aktrisa bo‘lishni o‘ziga ep ko‘rmagani va sahnaga qaytolmasligining sabablari haqida gapirdi (foto)

O‘zbekiston xalq artisti Gulchehra Jamilova “Izlarim” ko‘rsatuviga bergan intervyusida “O‘tkan kunlar” filmining yangi talqinida suratga tushib xato qilgani va sahnaga qaytolmasligining sabablarini ochiqladi.

— “O‘tkan kunlar” filmining yangi talqinida rol ijro etib adashdim, deb hisoblayman. Avval bu rolni rad qilgandim. Chunki liboslarning Marg‘ilon uslubida tikilmaganini ko‘rib, ko‘nglim g‘ash bo‘lgandi. Rahmatli rejissyor Shuhrat Abbosov ko‘zimga qaramay, “Gulchehra, shuni o‘ynang. Bu eng yaxshi rolingiz bo‘ladi”, degani uchun rad etolmagandim. Rosti, ko‘nglim chopmay shu rolni ijro etishga majbur bo‘ldim. Bu mening xatoyim bo‘ldi, deydi Gulchehra Jamilova.

Gulchehra Jamilova nima uchun sahnadan ketgani va qanday taklif bo‘lsa unga qaytishi mumkinligi haqida gapirdi

— Bugungi kunda yaxshi rejissyor va asar bo‘lganida edi, bitta spektaklda rol ijro etish uchun ham teatr sahnasiga qaytardim. Hech kimni kamsitmoqchi emasman, ammo ulardan ko‘nglim to‘lmaydi. Shukrki, faoliyatim davomida turli rollarni ijro etdim, shu bilan birga, sahnadagi eng yaxshi rolim bilan nafaqaga chiqdim — bu “Fig‘on” spektakli edi. Bu xuddi mehmondorchilikdan izzati borida ketishdek gap, deydi aktrisa.

Gulchehra Jamilova shuncha yillik faoliyati davomida biror marta to‘y xizmatlarini o‘tkazmagani va buni nima uchun istamasligi haqida gapirdi

— To‘g‘ri, pul hammaga kerak. Turmush o‘rtog‘im bilan bir umr faqat quruq oylikka tirikchilik qildik. Bir kuni puldan qiynalib turganimizda “Eh, hech bo‘lmaganda childirma ham chalmabman”, deb kuldilar. Chunki ikkimizning topganimiz bir kam-ko‘stni to‘g‘rilasak, ikkinchisiga yetmay qolardi. Tasavvur qiling, men kunduzi challar marosimini o‘tkazib, kechki spektaklda Zebinisoning rolini ijro etsam.

Xotin-xalajning marosimida meni umuman boshqa qiyofada ko‘rgan tomoshabinlar kechqurun tarixiy obrazda ko‘rib, qanday qabul qilishadi? Zalda bir-biriga “Voy, bugun challarida ko‘rgandik” dedimi, boshqalarning ham xayoli buziladi. Bunday munosabat menga to‘g‘ri kelmaydi. Shu bois ham to‘y xizmatlariga borishni o‘zimga ep ko‘rganim yo‘q. Bundan tashqari, men tabiatan birov ovqat yeb o‘tirganida, o‘rnimda turib oddiy tabrik so‘zi ham aytishni istamayman. Buni menga nisbatan behurmatlik deb bilaman. To‘yga borayotgan aktrisalar qaddini ursin — eplasa va o‘ziga maʼqul bo‘lsa, xizmatlarga boraverishsin, deydi Gulchehra Jamilova.