Daryabay Kaypov 24-oktyabr kuni Qoraqalpog‘iston Respublikasi qishloq xo‘jaligi vaziri lavozimiga tayinlandi. Bu haqda Qoraqalpog‘iston Jo‘qorg‘i Kengesi matbuot xizmati xabar berdi.
Tayinlovga qadar u Qoraqalpog‘iston Respublikasi Vazirlar Kengashi raisining qishloq va suv masalalari bo‘yicha o‘rinbosari edi. Ushbu lavozimni Shuhrat Teshayev egalladi. Bungacha u O‘zbekiston fermer, dehqon xo‘jaliklari va tomorqa yer egalari kengashi raisining birinchi o‘rinbosari lavozimida ishlab kelayotgandi.
Shuhrat Teshayev 1969-yil Buxoro viloyatida tug‘ilgan. 1993-yilda Toshkent davlat agrar universitetini tamomlagan. U mehnat faoliyati davomida “Paxta” ilmiy-ishlab chiqarish birlashmasi bosh direktori, qishloq va suv xo‘jaligi vazirining agrotexnologiya masalalari bo‘yicha birinchi o‘rinbosari sifatida ishlagan.
2014—2016-yillarda O‘zbekiston qishloq va suv xo‘jaligi vaziri bo‘lgan. 2016—2018-yillarda qishloq va suv xo‘jaligi vaziri o‘rinbosari — Qishloq xo‘jaligi ilmiy-ishlab chiqarish markazi bosh direktori, 2018—2019-yillarda Farg‘ona viloyati hokimining qishloq va suv xo‘jaligi masalalari bo‘yicha o‘rinbosari lavozimida xizmat qilgan. 2019-yil 26-fevraldan 2022-yil sentyabrigacha O‘zbekiston qishloq xo‘jaligi vazirining birinchi o‘rinbosari sifatida ishladi.
Izoh (0)