“Manchester Siti” hujumchisi Erling Holand Chempionlar Ligasida 44 ta gol urdi va Yevropaning asosiy turnirida to‘purarlar ro‘yxatida 16-o‘rinni egallab turibdi.
Norvegiyalik futbolchi Chempionlar Ligasi umumiy bosqichi 3-turidan o‘rin olgan “Sparta” (5:0) bilan o‘yinda dubl qayd etdi. Squawka xabariga ko‘ra, 24 yoshli norvegiyalik forvard bu ko‘rsatkich bo‘yicha Kot-dʼIvuar termasining mashhur hujumchisi Didye Drogbaga (44) yetib oldi. Vaholanki, norvegiyalik hujumchi turnirda bor-yo‘g‘i 42 o‘yin o‘tkazdi. “Chelsi”ning sobiq hujumchisi Chempionlar Ligasida 92 ta o‘yinda maydonga tushib 44 ta gol urgan.
Joriy mavsumda Holand klub va terma jamoa safida 16 ta o‘yin o‘tkazib, 16 ta gol va 8 ta golli uzatmani amalga oshirdi. Transfermarkt internet portaliga ko‘ra, hujumchining taxminiy narxi 200 million yevroni tashkil qiladi.
Chempionlar Ligasining to‘purarlar ro‘yxatini Ronaldu boshqarib turibdi. Portugaliyalik futbolchining musobaqadagi gollari soni 140 tani tashkil etadi. Messi 129 ta gol bilan ikkinchi o‘rinni egallab turibdi. Levandovski 92 ta gol bilan kuchli uchlikni yakunlab turibdi.
Izoh (0)