Sog‘liqni saqlash vaziri Asilbek Xudoyorov OAV vakillari bilan suhbatda O‘zbekistonda “Dok-1 Maks” voqeasi sabab nogiron bo‘lib qolgan bolalarga davlat tomonidan tibbiy yordam berilayotganini ma’lum qilgandi. Farzandi 2022-yil dekabr oyida “Dok-1 Maks”dan zaharlangan va 65 kun komada yotgan Feruz Nuritdinovning aytishicha, vazir jamoatchilikka yolg‘on ma’lumot bergan.
O‘sha vazir ham, uning xodimlari ham hatto davlatning birorta shifoxonasi shifokorlari ham biror marta o‘g‘limning holidan xabar olmagan-ku. Qanday qilib ko‘mak berayotgan ekan? Hatto uyimning eshigi qaysi tomonga ochilishini bilmay turib, biz nogiron bo‘lib qolgan bolalarni davolayapmiz, ko‘mak beryapmiz deyishga uyalmadimi? O‘sha vazirdan so‘rang-chi, dorimas, birorta shpris berganmikan? Vazir bunday yolg‘on gapirib tursa, undan pastdagilardan nima kutaylik?, deydi “Dok-1 Maks” siropi sabab gapirishdan, yurishdan to‘xtagan va birinchi guruh nogironiga aylangan 5 yoshli Alibek O‘ktamovning otasi Feruz Nuritdinov.
Feruz Nuritdinovning aytishicha, vazirning bu gapidan so‘ng ko‘pchilik ota-onalar vazir bilan ko‘rishish niyatida yuribdi.
2022-yilning dekabr oyi boshlarida bolam shamollab qolgani uchun “Dok-1 Maks” siropini ichira boshladik. O‘g‘lim sirop ichishni boshlashidan uch kun o‘tib, qayt qildi. Nukus shahridagi shifoxonada bolamning ikki buyragi ishlamayotganini aytib, Toshkentga olib borish kerakligini uqtirishdi, degandi avvalroq “Daryo” jurnalistiga bu haqida gapirib bergan ota.
Jabrlanuvchining aytishicha, u farzandini davolatish uchun ayni kunga qadar sotilgan uyi va yaqinlaridan olingan qarzlari evaziga to‘plangan katta miqdordagi mablag‘ini sarflab bo‘lgan. Shunga qaramasdan, uning farzandi gapirolmaydigan, yurolmaydigan nogironga aylangan.
Izoh (0)