Qiziqchi Zokir Ochildiyev Mirshakar Fayzullayevga bergan intervyusida mashhurlikka erishgan paytlarda ham moliyaviy qiyinchiliklarga uchragani va Jahongir Otajonov ijodini parodiya qilganidan afsuslangani haqida gapirdi.
— Toshkentda ijodni boshlashdan avval Samarqand viloyatida ancha tanilib qolgandik. Chunki o‘sha paytda viloyat televideniyesida ko‘rsatuvimiz bor edi. Sherigim ikkimizni Samarqand va Jizzax viloyati tomoshabinlari yaxshi tanishardi. Masʼul shaxslar ko‘rsatuvimizni ko‘rib, “Respublika televideniyesida ham bersa bo‘larkan”, deyishganidan keyin Toshkentga kelishga qaror qilganmiz. Ilk ko‘rsatuvimizning o‘ziyoq mashhurlikka erishgan, ertasi kundan boshlab ko‘chalarda taniy boshlashgan. Hatto tuzukroq kiyim-bosh olishga ham ulgurmay qolganmiz. Sherigimning taklifi bilan o‘zimizga 2-3 o‘lcham katta kostyum-shim tiktirardik. O‘ylab qarasam, bizdan ko‘ra kiyimimizning egnimizda turishi juda kulgili edi.
Taksiga pulimiz bo‘lmay, avtobusga chiqsak, odamlar tanib qolib “Iya sizlar ham avtobusdan foydalanasizlarmi?” deyishardi. Aslida cho‘ntagimizda o‘sha yo‘lkirani to‘lashga ham pulimiz yo‘q edi. Xalq tanigani uchun yo‘l pulini to‘lardik, bo‘lmasa orqa eshikdan sekingina tushib ketardik. Chunki haqiqatan ham nomimiz bor-u, pulimiz yo‘q edi. Ortiq Sultonovning akasining taklifi bilan Chorsuda quruq meva sotadigan urgutliklar bilan bir kvartirada yashaganmiz. Bir xonada kamida oltita odam yotadi, biz ham “Biroz surilinglar”, deb joylashib olardik. Chunki alohida uy ijaraga olishga pulimiz yo‘q edi.
Sherigim ikkimiz uylangan, bola-chaqali odamlar edik. Ammo uy yo‘qligi sabab ikkimiz ham Toshkentga oilamizni olib kelmaganmiz. Yigirma bir yoshda uylanib, bir yildan keyin farzandli bo‘lgan odam edim. Buning uchun ayolimga rahmat aytishim kerak, o‘sha vaziyatda meni tushungan. Ro‘zg‘orning bor qiyinchiligini bo‘yniga olgani uchun ham Toshkentda erkin ijod qilolganman. Keyinchalik pul to‘plab, Urgutdagi uyni sotib, Toshkentdan xonadon olganmiz. Oilasi bilan ijara uyda yashab, qiyinchilik ko‘rgan insonlarni ko‘p uchratganimiz uchun bunday qilishni istamaganman. O‘ylab qarasam, shu yoshgacha qilgan eng aqlli qarorim shu bo‘lgan ekan, deydi Zokir Ochildiyev.
Qiziqchi Jahongir Otajonovning qo‘shig‘ini parodiya qilganidan afsuslangani haqida gapirdi
— Jahongir Otajonovning “Qaddi baland” degan mashhur qo‘shig‘i bor. Shunga parodiya qilib, dollar kursining oshishi haqida hazil qo‘shiq tayyorlagandim. Odatda qaysi xonandaning qo‘shig‘ini kuylasam, xursand bo‘lib, minnatdorlik bildirishardi. Men ham bundan Jahongir xursand bo‘ladi, deb xato o‘ylagan ekanman. U YouTube tarmog‘idan qo‘shiq va klipimni bloklatib, qo‘shimchasiga intervyularida ham gapirgan. Men-ku indamaganman, ammo odamlarning o‘zi unga negativ yozishgandi. Men qilgan ishimdan afsuslanganman, nega ham shu qo‘shiqni tanladim, deb o‘zimni koyiganman, deydi Zokir Ochildiyev.
Izoh (0)