Italiyalik syorfingchi Julia Manfrini Indoneziyada nayzabaliq bilan to‘qnashuv oqibatida fojiali tarzda vafot etdi. Bu haqda La Gazzetta dello Sport xabar bermoqda.
Xabar qilinishicha, nayzabaliq suvdan sakrab chiqib, 36 yoshli syorfingchining ko‘kragiga zarba bergan. Fojia juma, 18-oktyabr kuni ertalab G‘arbiy Sumatradagi Mentavay orollari suvlarida yuz bergan.
Jabrlanuvchiga voqeaga guvoh bo‘lgan ikki kishi tomonidan tez yordam ko‘rsatilgan. Ular uni zudlik bilan kasalxonaga olib borgan, biroq sportchini saqlab qolishning iloji bo‘lmagan.
Qayd etilishicha, iyun oyida xuddi shunday halokatli voqea sodir bo‘lgan, o‘shanda amerikalik Erik Soreker vafot etgan. 2023-yil dekabrida italiyalik Alberto Markon nayzabaliq hujumiga uchragan. Sportchi olgan jiddiy jarohatlarga qaramay omon qolishga muvaffaq bo‘lgan.
Izoh (0)