Prezident raisligida “Yashil makon” umummilliy loyihasi doirasida amalga oshirilgan ishlar natijadorligi va kelgusidagi ustuvor vazifalar yuzasidan videoselektor yig‘ilishi boshlandi. Bu haqda Prezident matbuot xizmati xabar berdi.
Kun tartibidagi asosiy masalalarga o‘tishdan avval davlatimiz rahbari yig‘ilganlarni, butun xalqimizni bugungi ulug‘ bayram – o‘zbek tiliga davlat tili maqomi berilganiga 35 yil to‘lgan sana bilan samimiy tabrikladi. Ona tilimiz – bizni asrlar davomida yagona xalq sifatida birlashtirib, tarixiy xotiramiz, milliy qadriyatlarimizni avloddan avlodga bezavol yetkazib kelayotgan bebaho boyligimiz ekani taʼkidlandi.
“Bundan keyin ham ona tilimizni qadrlash, rivojlantirish borasidagi ishlarimizni qatʼiy davom ettiramiz”, - dedi prezident.
Bugun “Yashil makon” umummilliy loyihasi muhokamasiga bag‘ishlangan yig‘ilishda ona tilimiz rivojiga alohida urg‘u berilayotgan bejizmasligi, ona tabiatimiz, hovlimiz, mahallamiz, shahar va qishloqlarimizdagi gullar, daraxtlar, yashil maysalar singari ona tilimiz ham har kuni, har daqiqada g‘amxo‘rlikni talab etishi taʼkidlandi.
Yig‘ilishda “Yashil makon” umummilliy dasturi ijrosi va kuzgi mavsumda ishlarni jadal tashkil qilish masalalari ko‘rib chiqilmoqda.
Bugun Prezident Markaziy Osiyo atrof-muhit va iqlim o‘zgarishini o‘rganish universiteti bilan tanishdi. Unda ekologiya, barqaror boshqaruv, atrof-muhit iqtisodiyoti, ekologiya huquqi, ekologik innovatsiya va raqamlashtirish yo‘nalishlarida 500 nafar bakalavr va magistr tayyorlanadi.
Bu bilan ekologiya tizimiga ham zamonaviy kadrlar tayyorlaydigan mustahkam zamin yaratildi.
Viloyat hokimlariga har bir viloyatda 1 tadan ushbu universitet texnikumini tashkil qilish topshirildi. Texnikum atrofida ilmiy-amaliy mashg‘ulotlarni olib borish uchun dendrologiya bog‘i ham tashkil qilinadi.
Yangi o‘quv yilidan universitetda dual taʼlimni yo‘lga qo‘yish, urug‘chilik, ko‘chatchilik, iqlim o‘zgarishi bo‘yicha qisqa kurslar tashkil qilib, har yili 1 ming nafar xodimning malakasini oshirish muhimligi ko‘rsatib o‘tildi.
Izoh (0)