Avariyalarni oldini olishga sabab bo‘luvchi omillar o‘rganilganda 112 ta podstansiyadagi elektr qurilmalarning 356 tasida meyoridan ortiq qizish holatlari aniqlandi, deb xabar bermoqda “O‘zenergoinspeksiya” matbuot xizmati.
Vazirlar Mahkamasi huzuridagi ushbu inspeksiya energetika obyektlarida elektr qurilmalarini texnik ekspluatatsiya qilish, kuz-qish mavsumiga tayyorgarlik ko‘rish bo‘yicha amalga oshirilayotgan ishlar yuzasidan doimiy nazorat tadbirlari olib borilayotganini ma’lum qildi.
Xususan, hududlardagi podstansiyalar va transformator punktlaridagi kontaktlar va boltli birikmalarida paydo bo‘layotgan qizishlarni aniqlash bo‘yicha teplovizor ko‘riklari amalga oshirilmoqda. Unga ko‘ra 112 ta podstansiyalardagi elektr qurilmalarning 356 tasida me’yoridan ortiq qizish holatlari aniqlangan.
“Energetika obyektlaridagi mas’ul shaxslar tomonidan kontakt birikmalardagi qizishlarni aniqlash va ularni bartaraf etish bo‘yicha o‘z vaqtida choralar ko‘rilmayotgani oqibatida avariyaviy o‘chishlarga, uskunalarni shikastlanishiga va o‘z navbatida elektr ta’minoti buzilgan iste’molchilarni o‘rinli e’tirozlariga sabab bo‘luvchi holatlar yuzaga kelmoqda”, deyiladi inspeksiya xabarida.
Qayd etilishicha, o‘tkazilgan o‘rganishlar natijalari bo‘yicha ma’lumotnomalar rasmiylashtirilib, inspeksiya tomonidan tizim korxonalariga tegishli ko‘rsatmalar berildi va uning bajarilishi nazoratga olindi.
Izoh (0)