AQSHning Weill Cornell Medicine kolleji, Rokfeller universiteti va Ikan tibbiyot maktabi olimlari miyadagi neyron guruhlari faoliyatini nazorat qila oladigan gen terapiyasi texnologiyasini ishlab chiqdi.
Mazkur texnologiya Parkinson kasalligi, depressiya, surunkali og‘riq, hatto semizlikni davolash uchun magnit maydon yordamida inson boshidagi zanjirlarni o‘chirishi yoki yoqishi mumkin.
Qizig‘i shundaki, ilm-fan va texnologiya rivojlanishi bilan miya kasalliklarini davolashning turli usullari, xususan, nurga sezgir oqsillarni o‘ziga xos nerv hujayralariga yetkazib bera oladigan optogenetika paydo bo‘la boshladi. Avval buning uchun optik tolali implant kerak bo‘lgan bo‘lsa, yangi tadqiqot orqali usiz ham muvaffaqiyatga erishildi.
Avvaliga olimlar moddalarning hujayra membranasi orqali o‘tishi uchun maxsus yo‘llarga yig‘iluvchi o‘ziga xos xususiyatlarga ega oqsilni yaratishdi. Keyin esa unga ferritin nomli temir tutuvchi oqsil-tuzoqqa yopishish imkoni berildi. Oxirgi bosqichda yuqorida aytib o‘tilgan ferritin tomonidan ushlab turilgan atomlarga ta’sir o‘tkazish va kanallarni ochib-yopish uchun magnit maydonidan foydalanildi.
Parkinson kasalligi bo‘lgan sichqonlar ustida o‘tkazilgan dastlabki tajribalarga ko‘ra, magnit-rezonans tomografiya yoki MRT skanerining subyektlarga ta’siri ularni joyida harakatsiz holatga keltirgan. Ya’ni, olimlar har qanday harakatni nazorat qila olgan. Ushbu texnologiyani insonlarda qo‘llash orqali xarakterli motor tebranishlari va titroqlarni, shuningdek, surunkali miya kasalliklari paytida boshqa g‘ayritabiiy harakatlarni kamaytirishga erishish mumkin bo‘ladi.
Izoh (0)