Sentyabr oyida O‘zbekiston aholisi tomonidan sezilgan inflyatsiya darajasi 13,4 foizni tashkil etdi. Avgustdagi ko‘rsatkich 13,6 foiz bo‘lgan. Bu haqda Markaziy bank maʼlum qildi.
O‘tkazilgan so‘rov natijasiga ko‘ra, o‘tgan oyda sezilgan inflyatsiyaning eng yuqori darajasi Toshkent shahrida qayd etilgan — 15,4 foiz. Shu bilan birga, Andijon (14,6 foiz), Surxondaryo (14,5 foiz), Buxoro (13,9 foiz) viloyatlarida ham inflyatsiya boshqa hududlardagiga qaraganda yuqoriroq sezilgan.
Eng past sezilgan inflyatsiya darajasi Farg‘ona viloyatida bo‘lgan —12,1 foiz. O‘z navbatida Navoiy (12,3), Jizzax (12,5 foiz), Xorazm (12,6 foiz) viloyatlari hamda Qoraqalpog‘istonda ham inflyatsiya nisbatan past sezilgan.
-g2A5KtD1.jpg)
Daromadi 2–5 million so‘m oralig‘ida bo‘lgan aholi inflyatsiyani 12,7 foizdan 13,7 foizgacha sezgan. Daromadi 5–15 million so‘mgacha yetadiganlar esa inflyatsiyani 13,7 foizdan 15,4 foizgacha sezayotganini qayd etgan.
Avgust–sentyabr oylarida aholi tomonidan narxlarida yuqori o‘sish kuzatilgan asosiy turdagi tovarlar va xizmatlar ham maʼlum qilingan. Xususan, benzin va yoqilg‘i narxlari keskin oshayotganini his qilayotganlar ulushi 34 foizdan 39 foizga yetgan. Dorilar narxi oshganini qayd etganlar 25 foizdan 29 foizgacha, ijara haqi o‘sganini his qilganlar 14 foizdan 18 foizga yetgan.
Sentyabrda narxi yuqori o‘sgan mahsulotlar qatorida go‘sht va sutni ko‘rsatganlar ulushda birinchi o‘rinda bo‘lsa-da, ko‘rsatkich 57 foizdan 56 foizga kamaygan.
Izoh (0)