Hukumat qarori bilan Oybek Elmuratov Farmatsevtika tarmog‘ini rivojlantirish agentligi direktori o‘rinbosari etib tayinlandi. Bu haqda Sog‘liqni saqlash vazirligi matbuot xizmati xabar berdi.
Oybek Elmuratov 1999-yilda Toshkent moliya institutini tamomlab, mehnat faoliyatini “O‘zmilliybank” Loyihani moliyalashtirish markazi mutaxassisi sifatida boshlagan.
Keyinchalik Moliya vazirligida bo‘lim boshlig‘i o‘rinbosari, ushbu vazirlikning Yo‘l jamg‘armasi boshlig‘i o‘rinbosari, BMTning O‘zbekistondagi loyiha menejeri, “O‘zkimyosanoat” davlat aksiyadorlik kompaniyasi departamenti boshlig‘i, Investitsiyalar va tashqi savdo vazirligida boshqarma boshlig‘i kabi qator mas’ul vazifalarda mehnat qilgan.
Tayinlovga qadar Xorijiy investitsiyalarni jalb etish agentligi direktori vazifasini bajaruvchi lavozimida ishlab kelgan. Ushbu agentlik rahbari Murod Mirzayev 2024-yilning yanvarida egallab turgan lavozimidan ozod etilgandi.
2024-yilning yanvarida Zafar To‘xtayev Farmatsevtika tarmog‘ini rivojlantirish agentligi direktori o‘rinbosari etib tayinlangandi. Agentlikka 2023-yil oktyabridan buyon Abdulla Azizov rahbarlik qilib kelmoqda.
Izoh (0)