NATOning o‘z hududini yadroviy hujumdan himoya qilish bo‘yicha Steadfast Noon nomli yillik mashg‘ulotlari 14-oktyabrda boshlanadi. Bu haqda NATO bosh kotibi Mark Ryutte ma’lum qildi.
Uning taʼkidlashicha, bu yilgi mashg‘ulotlarga 60 dan ortiq samolyot jalb etiladi. Mashqlar Shimoliy dengiz uzra – Buyuk Britaniya, Belgiya va Niderlandiya havo maydonlarida o‘tkaziladi.
“Beqaror dunyoda dushmanlar NATO har qanday tahdidga javob berishga tayyor va qodir ekanligini bilishlari uchun mudofaa kuchimizni sinab ko‘rishimiz hamda mustahkamlashimiz juda muhim”, deya tushuntirdi Ryutte.
Dpa agentligiga ko‘ra, Shimoliy Atlantika alyansi mazkur mashg‘ulotlar Rossiyaning Ukrainaga qarshi tajovuzkor urushiga reaksiya emasligini ta’kidlagan.
Manyovr ssenariysiga oid tafsilotlar ochiqlanmagan. Harbiy ekspertlarning fikricha, har yili o‘tkaziladigan bu mashg‘ulotlar AQSH yadro qurolini yer osti omborlaridan samolyotlarga xavfsiz yetkazib berilishi va ularning o‘rnatilishini sinovdan o‘tkazadi.
“Biroq o‘quv parvozlari haqiqiy qurollardan foydalanmagan holda amalga oshirilmoqda”, deya aniqlik kiritadi DPA.
NATOning ushbu dasturi Yevropada joylashgan Amerika yadroviy qurollarini favqulodda vaziyatlarda hamkor samolyotlardan dushman nishonlariga tashlashni nazarda tutadi. Rasmiy tasdiqlanmagan ma’lumotlarga ko‘ra, bunday qurollar Italiyaning shimolida, Turkiya, Belgiya, Niderlandiyada, shuningdek, Germaniyaning Reynland-Pfalz federal shtatidagi Byuxel bazasida saqlanadi.
Izoh (0)