Kuz kelib, havo harorati sekin-astalik bilan pasayib bormoqda. Bu vaqtda immunitet ham tushib, shamollashga moyillik oshadi. Xo‘sh, kuzda qo‘zg‘aladigan kasalliklarning oldini olish uchun nima qilish kerak? Quyida sizga oddiy va sodda, biroq yuqori samarali tavsiyalar yordam beradi.
Termo kiyim kiying
Kuzda badanni sovuqdan asrashga alohida e’tibor berish kerak. Chunki issiqdan sovuqqa o‘tayotganda istalgan kishida ma’lum bir o‘zgarishlar bo‘ladi. Bu davrda ko‘pchilikda asosan, yuqori nafas yo‘llari kasalliklari yoki allergik kasalliklar paydo bo‘ladi. Albatta, o‘ta qalin kiyinish shart emas, chunki sovuqda terlagan badanning shamollash ehtimoli deyarli 100% gacha oshadi.
Ammo fasl va ob-havoga mos ravishda kiyinmasak ham turli infeksiyalarga organizm bardoshliligi kamayishi muqarrar. Bunday holatda termo kiyimlar yordam beradi. Sifatli termo kiyim tanani terlatmaydi, badanni issiq va quruq saqlaydi.
Qalpoq va sharf kiyishni kanda qilmang
Bolalikda ko‘pchilik qalpoq kiyishni yoqtirmagan. Maktabga yo‘l olgan bolalar uyidan uzoqlashishi bilan qalpog‘ini yechib tashlaganiga ham guvohi bo‘lganmiz. Sovuq kunlarda bosh va bo‘yin qismi himoyalanmasa, bu tanadagi ko‘plab jarayonlar uchun mas’ul bo‘lgan miyaning yallig‘lanishiga, quloqlar shamollashiga olib kelishi mumkin.
Uyqu rejimiga amal qiling
Balki ushbu layfxak kulgili tuyular, ammo uyquga to‘yish ham organizmning turli infeksiyalarga chalinishiga qarshiligini oshiradi. Uyquning yetishmasligi immunitetni zaiflashtiradi, natijada viruslar tanaga osongina kirib boradi. Shu sababli kuzda muntazam ravishda yaxshi uxlash muhimdir.
O‘zingizni tetik va sog‘lom his qilish uchun qancha uyqu kerakligini ko‘rib chiqing va ushbu tartibga rioya qiling. Yotishdan oldin xonani shamollatishni unutmang, chunki bu dam olishga va tashvishli fikrlardan xalos bo‘lishga yordam beradi.
Ko‘proq vitaminlar va kamroq shirinliklar iste’mol qiling
Bizning immun tizimimiz o‘ziga xos, u genimiz, atrof-muhit, iste’mol qilayotgan oziq-ovqatlar va biz duch keladigan mikroblar ta’sirida yaraladi. Kuzda organizmni kasalliklardan himoya qilish uchun ko‘proq vitaminlarga boy yangi sabzavot va mevalar iste’mol qiling, shirinliklarni cheklang.
Qiziqarli fakt: Loma Linda universiteti olimlari shakarni suiiste’mol qilish immunitetning patogen bakteriyalardan himoya qilish uchun javob beradigan qon hujayralari faoliyatiga salbiy ta’sir ko'rsatishini isbotlagan. Agar shirinlik yeyishni istasangiz, biror ho‘l meva bilan tamaddi qilishingiz mumkin.
Qo‘llaringizni tez-tez yuving va dezinfeksiya qilishni unutmang
Ushbu maslahat nafaqat kuz uchun, balki yilning istalgan vaqti uchun ham mos keladi, chunki qo‘llar barcha turdagi viruslar va bakteriyalarning eng xavfli tashuvchisi hisoblanadi.
Nafaqat ovqatlanishdan oldin, balki har safar gavjum joylarga, masalan, jamoat transportidan foydalangandan keyin, shuningdek, jismoniy aloqadan keyin — qo‘l berib ko‘rishishda ularni yuvishga odatlanish kerak. Bundan tashqari, viruslar eshik tutqichlari, uyali telefon, kompyuter klaviaturalari va albatta, pulda juda ham ko‘p bo‘ladi. Shuning uchun qish va kuzda qo‘llarni tez-tez yuvish salomatlik uchun foydalidir.
Ayniqsa, ofisda ishlaydiganlar eshik tutqichlari, ish stolining yuzasi, mikroto‘lqinli pechning va kun davomida juda ko‘p odamlar tegadigan joylarni dezinfeksiyalovchi vosita yoki hech bo‘lmaganda spirtli salfetka bilan artib olishi zarur. Tozalashga sarflangan bir necha soniya ham sog‘liqni asrashga yordam beradi.
Malinali murabbo qo‘shib choy iching
Malina rezavori superfud hisoblanib, turli kasalliklarning oldini olish va davolashda qo‘llanadi. Masalan, malinadagi antioksidantlar va fitonutriyentlar immunitetni oshiradi, salitsil va foliy kislotalari O‘RVIdan tezroq xalos bo‘lishga yordam beradi. Darvoqe, shamollashga qarshi malinali murabbodan choy tayyorlaganda uni qaynoq suvga emas, balki o‘rtacha issiqlikdagi suvga solish lozim, aks holda malinaning foydali xususiyatlari yo‘qoladi.
Bundan tashqari, malinali choy mikroblarga qarshi kurashish xususiyatlarga ega va tarkibidagi vitaminlar va minerallar quvvatni tiklashga va immunitet tizimini mustahkamlashga yordam beradi.
Kamroq asabiylashishga harakat qiling
Ha, bu oson emas, lekin hayotingizdagi stress miqdorini kamaytirishga harakat qilishingiz kerak. Ma’lumki, asabiylashish tufayli nerv tizimi juda zaiflashadi, bu esa tananing turli viruslar va infeksiyalarga nisbatan zaifroq bo‘lishiga olib keladi.
Izoh (0)