“Katta Dubulg‘a” turnirlarining 22 karra chempioni, jahonning sobiq birinchi raqamli tennischisi ispaniyalik Rafael Nadal “Devis kubogi” finalidan so‘ng professional faoliyatini yakunlaganini e’lon qildi.
“Men sizga professional tennisdagi faoliyatini yakunlayotganimni ma’lum qilish uchun keldim. Xaqiqat shundaki, so‘nggi bir necha yil, ayniqsa, oxirgi 2 yil qiyin bo‘ldi. Bor imkoniyatim bilan o‘ynay oldim, deb o‘ylamayman. Bu qarorni qabul qilish qiyin va mendan ko‘p vaqt talab qildi.
Ammo bu hayotda hamma narsaning boshlanishi va oxiri bor va o‘ylaymanki, endi uzoq va men tasavvur qilganimdan ham muvaffaqiyatliroq o‘tgan karyeramni tugatish vaqti keldi.
Oxirgi turnirim “Devis Kubogi” finali bo‘lgani va o‘z vatanim sharafini himoya qilayotganimdan juda xursandman. Bu to‘liq aylanani bosib o‘tishga o‘xshaydi, chunki professional tennischi sifatida mening birinchi katta turnirlarimdan biri 2004-yilda o‘tgan Sevilyadagi final bo‘lgan”, dedi Nadal ijtimoiy tarmoqda.
Eslatib o‘tamiz, “Devis Kubogi-2024” final bosqichi 19-24 noyabr kunlari Malaga shahrida (Ispaniya) bo‘lib o‘tadi.
38 yoshli Rafael Nadal ikki karra Olimpiada chempioni hisoblanadi.
Izoh (0)