Ijtimoiy tarmoqlarda Qashqadaryo viloyatidagi mahalla raisi paxta terimiga chiqmaganlarga bola puli berilmasligini aytgan ovozli xabar tarqaldi. Holat yuzasidan Davlat mehnat inspeksiyasi o‘rganish o‘tkazdi, deb xabar bermoqda Kambag‘allikni qisqartirish va bandlik vazirligi.
Maʼlum qilinishicha, o‘rganish davomida Shahrisabz tumanidagi “Paxtakor” MFY raisi L.O‘roqov 9-oktyabr kuni Nushkent qishlog‘ining “Nushkent birlashaylik” Telegram kanaliga ushbu ovozli xabarni yuborgan.
Shu orqali mahalla raisi ishsiz fuqarolarni paxta yig‘im-terimiga chaqirgan, shundan so‘ng ular terimga kelgan.
Holat yuzasidan L.O‘roqovga nisbatan Maʼmuriy javobgarlik to‘g‘risidagi BHMning 50 baravari (18 mln 750 ming so‘m) miqdorida jarima qo‘llanildi.
- Avvalroq hukumat tomonidan 9-oktyabrdan boshlab qo‘lda terilgan 1 kg paxta uchun 2500 so‘mdan to‘lash belgilangan edi.
- O‘zbekistonda paxta terimiga majburlash bilan bog‘liq holatlar Senatning Odam savdosiga qarshi kurashish va munosib mehnat masalalari bo‘yicha milliy komissiyasi tomonidan nazoratga olingani haqida xabar berilgandi.
Izoh (0)