O‘zbekistondagi 12 ta bog‘chada Kokoro lingua platformasi yordamida fransuz tilini o‘qitish yo‘lga qo‘yiladi. Bu haqda Maktabgacha va maktab ta’limi vazirligi xabar berdi.
Hilola Umarova Fransiyada bo'lib o‘tgan Xalqaro Frankofoniya tashkilotining 19-sammitida ishtirok etgani haqida ma’lum qilingan edi. Sammit doirasida vazir va Kokoro lingua kompaniyasi asoschisi Natali Lasslet o‘rtasida uchrashuv bo‘lib o‘tdi.
O‘zbekistonning Fransiyadagi elchixonasi ko‘magida tashkil etilgan ushbu uchrashuvda tomonlar O‘zbekistondagi maktabgacha ta’lim tashkilotlarida 5-6 yoshli bolalar uchun innovatsion Kokoro lingua platformasi yordamida bolalarga fransuz tilini o‘rgatish masalalarini muhokama qildi.
Muhokamalar yakunida kelgusi bir yil davomida 12 ta maktabgacha ta’lim tashkilotlarida bepul tarzda fransuz tilini o‘qitish bo‘yicha kelishuv imzolandi.
Kokoro lingua — bolalar uchun til o‘rgatish bo‘yicha innovatsion platforma hisoblanadi. Unda bolalarga chet tilini qiziqarli usullar bilan asosan, videolar orqali 12 oy ichida kundalik muloqotda foydalaniladigan 250 ta so‘z va iboralarni o‘rganish imkonini beradi. Kokoro Lingua orqali bugungi kunda 500 mingdan ortiq bolaga til o‘rgatishda foydalanildi.
Uchrashuvlar davomida Hilola Umarova France Education International tashkiloti bosh direktori Olivye Brandui bilan ham uchrashgan. Unda fransuz tomoni bilan O‘zbekistondagi fransuz tili o‘qituvchilarini malakasini oshirish va trener o'qituvchilarini tayyorlash, o‘qituvchilar almashuv dasturini joriy qilish hamda O‘zbekistonda fransuz tili testlarini (DELF junior, DALF) joriy qilish masalalari yuzasidan kelishuvga erishildi.
France Education International 1945-yilda tashkil topgan bo‘lib, tashkilotning asosiy faoliyat yo‘nalishlaridan biri til bo‘yicha sertifikatlash va testlar tuzishdan iborat.
Izoh (0)