Eron milliy jamoasi bosh murabbiyi Amir G‘alinoyi Jahon chempionati saralashidan o‘rin olgan O‘zbekiston bilan o‘yin oldidan matbuot anjumanida qatnashdi. Unga jamoa hujumchisi Sardor Azmun hamrohlik qildi.
“Avvalo, O‘zbekiston milliy jamoasi bosh murabbiyi Srechko Kanatesga sog‘lik tilayman. Ertaga bizda ko‘p imkoniyatlar bo‘lmaydi. Avvalgi ikki o‘yinda vaziyatlarni ko‘kka sovurdik. Bu safar minimal imkoniyatlardan maksimal foydalanishimiz kerak”, dedi murabbiy.
Bundan tashqari, murabbiy galdagi o‘yin maydoni va Erondagi vaziyat haqidagi savolga javob berdi.
Tashqi narsalarga chalg‘imay, bor eʼtiborimizni futbolga qaratishimiz, tomoshabop o‘yin ko‘rsatishimiz va Toshkentdan 3 ochko olib ketishimiz kerak. Himoyamizdagi yo‘qotishlar? Dastlabki ikki turda “quruq o‘yin” o‘tkazdik va ertaga ham bu seriyani davom ettirishga urinamiz”, dedi forslar bosh murabbiyi.
Eron hujumchisi Sardor Azmun ham o‘z fikrlarini bildirib o‘tdi.
“Ertangi o‘yin juda muhim, ammo biz O‘zbekistonga qarshi qanday o‘ynashni bilamiz. Umid qilamanki, 3 ochko bilan qaytamiz”, dedi tajribali futbolchi.
Ma’lumot uchun, O‘zbekiston — Eron uchrashuvi ertaga “Bunyodkor” stadionida bo‘lib o‘tadi.
Izoh (0)