Superliga 2024-yilgi mavsumning 21-turi doirasida “Paxtakor” — “Dinamo” o‘yini bo‘lib o‘tdi. O‘zbekiston futbol hakamlari markazi mazkur uchrashuv tugagach, Ekspert-hakamlar komissiyasining navbatdagi yig‘ilishini o‘tkazdi va bahsli vaziyatlar tahlil qildi. Ma’lum bo‘lishicha, bu bellashuvda jami 4 ta bahsli vaziyat yuzaga kelgan.
Quyida ularning batafsil izohi va chiqarilgan yakuniy qarorlar bilan tanishishingiz mumkin:
1-vaziyat. “Paxtakor” — “Dinamo” to‘qnashuvi: mezbonlarning goli. “Paxtakor” — “Dinamo” uchrashuvining 9-daqiqasida mezbonlar gol urishga muvaffaq bo‘ldi. Bosh hakam Olim To‘ychiboyev VAR bilan muloqotdan so‘ng ofsayd yo‘qligini qayd etdi va golni inobatga oldi.
Ekspert-hakamlar komissiyasi qarori: Bu vaziyatda VAR holatga aralashmasdan to‘g‘ri qilgan. Boisi, ofsayd bor-yo‘qligini aniqlovchi chiziq texnik muammo sabab ishlamagan. VAR’da yetarli isbot bo‘lmagani uchun VAR hakami holatga aralasha olmaydi. Ekspert-hakamlar komissiyasi bosh va VAR hakamning qarorini qo‘llab-quvvatlaydi, ammo birinchi yordamchi hakamni xato qilgan, deb hisoblaydi.
2-vaziyat. “Paxtakor” — “Dinamo” to‘qnashuvi: mezbonlarning goli. “Paxtakor” - “Dinamo” uchrashuvining 33-daqiqasida mezbonlar o‘zining ikkinchi golini urdi. Bosh hakam Olim To‘ychiboyev mazkur holatni monitor orqali ko‘rgach, fol qayd etdi va golni bekor qildi.
Ekspert-hakamlar komissiyasi qarori: Mezbonlarning 10-raqamli futbolchisi to‘pni darvozaga kiritish uchun raqibiga nisbatan qo‘lini ishlatgan holda o‘yin qoidasini buzgan va gol urgan. Aynan shu kabi vaziyatlarda VAR holatga aralashishi kerak va VAR hakami to‘g‘ri qilgan. Ekspert-hakamlar komissiyasi tomonidan hakamlarning qarori to‘g‘ri, deb topildi.
3-vaziyat. “Paxtakor” — “Dinamo” qarama-qarshiligi: bahsli 11 metrlik jarima zarbasi. “Paxtakor” — “Dinamo” uchrashuvining 41-daqiqasida mezbonlar qulay vaziyatga ega bo‘ldi va shu holatda to‘p mehmonlarning 4-raqamli futbolchisiga tegib, o‘yinga qaytdi. Bosh hakam Olim To‘ychiboyev to‘p qo‘lga tekkanini qayd etdi va nuqtaga ishora qildi.
Ekspert-hakamlar komissiyasi qarori: Bu vaziyatda qo‘l notabiiy turibdi va uzatmadan so‘ng himoyachi to‘pga nisbatan qo‘li bilan harakat qilgan. 11 metrlik jarima zarbasi uchun yetarli asos mavjud. Ekspert-hakamlar komissiyasi tomonidan hakamning qarori to‘g‘ri, deb hisoblandi.
4-vaziyat: “Paxtakor” — “Dinamo” o‘yini: bahsli penalti. “Paxtakor” — “Dinamo” uchrashuvining 70-daqiqasida mezbonlarning 22-raqamli a‘zosi raqib jarima maydoniga yorib kirdi, so‘ng sheriklari tomon uzatma amalga oshirdi. Ayni shu paytda to‘p himoyachiga tegib, maydon tashqarisiga chiqdi. Bosh hakam Olim To‘ychiboyev bu vaziyatda to‘p qo‘lga tegganini ma‘lum qildi va nuqtaga ishora qildi. Ekspert-hakamlar komissiyasi qarori: Bu vaziyatda qo‘l notabiiy turibdi va uzatmadan so‘ng himoyachi to‘pga nisbatan qo‘li bilan harakat qilgan. 11 metrlik jarima zarbasi uchun yetarli asos mavjud. Ekspert-hakamlar komissiyasi tomonidan hakamning qarori to‘g‘ri, deb hisoblandi.
Ma’lumot uchun, ushbu uchrashuvda mezbonlar 4:2 hisobida g‘alaba qozondi. Gollarning ikkitasi penaltidan kiritildi. Uchrashuvda Dragan Cheran xet-trikka erishdi.
Izoh (0)