Antuan Grizmann Fransiya terma jamoasiga qaytish istagida.
Bu haqida jurnalist Romen Molina xabar bermoqda. “Atletiko” hujumchisi Zinedin Zidan uslubida terma jamoaga qaytmoqchi. Zidan ham termadagi faoliyatini yakunlaganidan bir yarim yil o‘tib, ortga qaytgan va JCH—2006 musobaqasi oldidan Fransiyaning sardori etib tayinlangandi.
30-sentyabr kuni Antuan Grizmann Fransiya terma jamoasidagi faoliyatini yakunlaganini e’lon qilgandi.
Molinaning so‘zlariga ko‘ra, agar terma jamoaning ishlari ko‘ngildagidek ketmasa, ular Grizmanni qutqaruvchi sifatida qaytarishi va loyihani uning atrofida qurilishi mumkin.
Shuningdek, so‘nggi yillarda Fransiya tarkibida o‘zini yetarlicha qadrlanmagan deya hisoblovchi Antuan ham ortga qaytishga qarshi emas.
Ma’lumot uchun, Grizmann Fransiya terma jamoasidagi debyutini 2014-yilning mart oyida o‘tkazgan edi. Hujumchi terma jamoa safida 137 ta o‘yin o‘tkazib, 44 ta gol urgan. 2018-yilda Antuan Fransiya terma jamoasi bilan Jahon Chempioni, 2021-yilda esa UEFA Millatlar Ligasida g‘olibiga aylangan.
Izoh (0)