Rossiya prezidenti Vladimir Putinning Sochidagi “Bocharov ruchey” qarorgohi bosh binosi buzildi. “Proyekt” loyihasi sun’iy yo‘ldoshdan olingan tasvirlarni o‘rgandi.
Hozirda qarorgoh o‘rnida kotlovan paydo bo‘lgan va atrofida qurilish texnikasi ishlab turibdi. Asosiy binoni buzish 2024-yil fevral oyida boshlangan, mart oyida yakunlangan. Qarorgohda ish olib borilayotgani haqida rasmiy xabar berilmagan. Bundan tashqari, Putin qarorgohni buzish boshlanganidan keyin bitta rasmiy uchrashuv o‘tkazgan: 2024-yil 6-mart kuni u MAGATE rahbari Rafael Grossi bilan ko‘rishgan. Uchrashuv davlat ommaviy axborot vositalarida yoritilgan va bu haqdagi xabar Kreml rasmiy saytida chop etilgan.
Putin Grossi bilan uchrashuvni qarorgoh chegarasida joylashgan majmuaning boshqa binosida – 2014-yilda Putinning rasmiy uchrashuvlari uchun qurilgan maxsus qabulxonada o‘tkazgan. Kreml matbuot kotibi Dmitriy Peskovga ko‘ra, asosiy binoda “hamma narsa funktsional jihatdan qoniqarli bo‘lmagan”. Yangi “ofis binosi” “Bocharov ruchey-2” deb nomlangan — u hozirda matbuot markazi va Putin rasmiy uchrashuvlar o‘tkazadigan majlislar zaliga ega.
Putin “Bocharov ruchey-2”da tadbirlarning katta qismini o‘tkazgan: 2014-yildan boshlab bu binoda Mudofaa vazirligi va harbiy-sanoat majmuasi vakillari bilan muntazam ravishda yig‘ilishlar bo‘lgan. Ammo urush bu an’anani buzgan — 2022-yilda bunday yig‘ilish o‘tkazilmagan.
2017-yilda “Bocharov ruchey” qarorgohiga maxsus temir yo‘l tarmog‘i olib kelingan. Shu tariqa, Putin u yerga zirhli poyezdida tashrif buyura olardi.
“Proyekt” maʼlumotlariga ko‘ra, Putin Sochiga oxirgi marta yetti oy oldin uchgan. Rossiya prezidentidan xabardor manbalar u dronlar hujumidan so‘ng o‘z hayotidan qo‘rqib Sochiga bormayotganini yozmoqda. 2023-yil sentyabr oyidan boshlab Putin foydalanadigan samolyotlar o‘z joylashuvini doimiy ravishda yashirishni boshlagan.
Izoh (0)