Bugun, 7-oktyabr kuni AOKAda bo‘lib o‘tgan brifingda Oliy sudi Jamoatchilik bilan aloqalar markazi boshlig‘i Aziz Obidov qanday shaxslar farzandlikka oluvchilar bo‘lishi mumkin emasligi yuzasidan axborot berdi.
Quyidagi shaxslar farzandlikka oluvchilar bo‘lishi mumkin emas:
- ota-onalik huquqidan mahrum qilingan yoki ota-onalik huquqi cheklanganlar;
- qonun bilan belgilangan tartibda muomalaga layoqatsiz yoki muomala layoqati cheklangan deb topilganlar;
- asab kasalliklari yoki narkologiya muassasalarida ro‘yxatda turuvchilar;
- farzandlikka oluvchi va farzandlikka olinuvchilar yoshidagi farq o‘n besh yoshdan kam bo‘lsa (o‘gay ota va o‘gay ona tomonidan farzandlikka olish hollari bundan mustasno).
Shuningdek, chet el fuqarosi yoki fuqaroligi bo‘lmagan shaxs tomonidan O‘zbekiston Respublikasining fuqarosi bo‘lgan bolani farzandlikka olish haqida ariza berilishi mumkin. Bunday ishni ko‘rib chiqishda sud nafaqat arizachi fuqarosi hisoblangan davlatning qonunchiligi, balki O‘zbekiston Respublikasining xalqaro shartnomalarini inobatga olgan holda O‘zbekiston Respublikasining qonunchiligi talablaridan ham kelib chiqadi.
Farzandlikka olish bo‘yicha ko‘rilayotgan sud ishida ishtirok etuvchi shaxslar ularga ma’lum bo‘lgan farzandlikka olish bilan bog‘liq ma’lumotlarni sir saqlashlari zarurligi, shuningdek farzandlikka olish sirini farzandlikka bola oluvchilarning yoki vasiylik va homiylik organining erkiga qarshi oshkor qilganlik uchun Jinoyat kodeksiga binoan jinoiy javobgarlikka tortilishlari mumkinligi to‘g‘risida ogohlantiriladi.
Ma’lumot uchun, 2023-yil mobaynida fuqarolik ishlari bo‘yicha sudlar tomonidan bolani oilaga farzandlikka olish bilan bog‘liq 5 ming 359 ta ish ko‘rilib, tamomlangan. Shundan 5 ming 11 ta da’vo ariza qanoatlantirilgan.
Joriy yilning birinchi yarim yilligida aynan shu toifadagi 2 ming 701 ta ish ko‘rilib, tamomlangan va 2 ming 543 ta da’vo ariza qanoatlantirilgan.
Izoh (0)