Daniel Karvaxal unga xochsimon to‘qimalar uzilishi tashxisi qo‘yilganini ma’lum qildi.
“Real Madrid” klubi himoyachisi La Liganing 9-turidan o‘rin olgan “Vilyarreal”ga qarshi o‘yinning 90+3-daqiqasida Yeremi Pino bilan kurashda to‘pni qaytarishga urinib, jarohat oldi. U o‘ng tizzasini changallab yig‘ladi. 32 yoshli ispaniyalik maydonni faqat zambilda tark eta oldi.
“Xochsimon paylarning jiddiy jarohati tasdiqlandi. Meni operatsiya qilishadi va bir necha oyni o‘tkazib yuboraman. Allaqachon tiklanishni va maydonga qaytishni intiqlik bilan kutyapman.
Barchangizga katta rahmat, men sizning katta ko‘magingizni his qilyapman”, deb yozdi Karvaxal ijtimoiy tarmoqdagi sahifasida.
Ma’lumot uchun, ushbu uchrashuvda qirollik klubi 2:0 hisobida g‘alaba qozondi.
Izoh (0)