Washington Post gazetasi Livandagi peyjerlarni portlatish bilan bog‘liq operatsiya tafsilotlarini aniqladi. Isroil tegishli amaliyotni 2022-yilda rejalashtirishni boshlagan. Bu haqda Isroil rasmiylari xabar berdi.
Ma’lum qilinishicha, “Hizbulloh”ni ko‘p miqdordagi Tayvanda ishlab chiqarilgan Apollo AR924 peyjerlarini xarid qilishga, ilgari Tayvan firmasida ishlagan, nomi aytilmagan marketing bo‘yicha mutaxassis ayol undagan. Keyinchalik u o‘z kompaniyasini tashkil etib, peyjerlarni sotish uchun litsenziya olgan.
“Hizbulloh” uchun peyjerlarni ishlab chiqarish uchinchi bir kompaniyaga topshirilgan, ammo “Hizbulloh” bilan bitimni tashkil etgan ayol, qurilmalar ichiga portlovchi modda joylashtirilgani va ularning “Mossad” buyurtmasi asosida Isroilda ishlab chiqarilgani haqida bilmagan.
“Hizbulloh” sotib olingan ba’zi peyjerlarni tekshirish uchun ularni qismlarga ajratgan, ammo portlovchi modda shunday joylashtirilganki, uni topish deyarli imkonsiz edi, deydi Isroil rasmiylari.
Isroilning “Mossad” maxsus xizmati 2015-yildayoq “Hizbulloh”ning xabari bo‘lmagan holda, unga portlovchi moddalar va eshitish tizimi o‘rnatilgan ratsiyalarni yetkazib berishni boshlagan, deyiladi xabarda.
Manbalarning aytishicha, qurilmalarni portlatishgacha bo‘lgan vaqt davomida “Mossad” faqat ratsiyalarni tinglash bilangina cheklangan.
Izoh (0)