Livanda so‘nggi 24 soat ichida 28 nafar tibbiyot xodimi hujumlar oqibatida halok bo‘ldi. Bu haqda JSST bosh direktori Tedros Adanom Gebreyesus X ijtimoiy tarmog‘ida yozdi.
“Livanda so‘nggi 24 soat ichida 28 nafar tibbiyot xodimi vafot etdi”, dedi u va mamlakat janubida 37 ta sog‘liqni saqlash muassasasi yopilganini qo‘shimcha qildi.
Unga ko‘ra, Bayrutda uchta shifoxona xodimlar va bemorlarni to‘liq evakuatsiya qilishga majbur bo‘lgan, yana ikkitasi esa qisman evakuatsiya qilingan.
“Ko‘plab tibbiyot xodimlari ishga bormayapti, chunki ular bomba portlashi tufayli ishlagan hududlaridan qochib ketgan. Bu ko‘plab yaradorlarni davolashni va tibbiy xizmatlarning uzluksizligini jiddiy cheklaydi”, dedi Gebreyesus.
Avvalroq Isroil samolyoti birinchi marta Bayrutning markaziy hududi — Bashuraga zarba bergani xabar qilingandi.
Livan Sog‘liqni saqlash vazirligining favqulodda vaziyatlar markazi maʼlumotlariga ko‘ra, zarbalar oqibatida olti kishi halok bo‘lgan, o‘nlab insonlar jarohatlangan.
Izoh (0)