Bu yilgi kuz nafaqat sevimli turk seriallarining davomiga, shuningdek, yorqin yangiliklarga ham boy.
Bahor (2-mavsum)
Ikki nafar farzandning onasi Bahor uy-ro‘zg‘or ishlarini qiladi, butun oila uchun taom tayyorlaydi, qaynonasi va eriga g‘amxo‘rlik qiladi, ammo o‘zi haqida sira o‘ylamaydi. Ko‘p yillar oldin u tibbiyot universitetini tugatgan, biroq kasal qaynotasiga qarash uchun ishlolmagan. Turmush o‘rtog‘i mashhur jarroh Temur Yavuzo‘g‘li bir necha kunga Parijga jo‘nab ketganda, ayol kutilmaganda hushidan ketadi. U shifoxonada o‘ziga keladi, unga shoshilinch tarzda jigar ko‘chirib o‘tkazish kerakligi va eri donor bo‘lishi mumkinligi ma’lum bo‘ladi. O‘lim yoqasiga kelib qolgan Bahor achchiq haqiqatga duch keladi — shundan so‘ng o‘zi uchun yashashga qaror qiladi va tibbiyotga qaytadi.
“Laylo” (1-mavsum)
Laylo onasidan erta ayriladi. Uning beva qolgan otasi Nur ismli go‘zal, aqlli, ammo shafqatsiz ayolga uylanadi. Otasining kutilmagan o‘limidan so‘ng, yetim Laylo boshpanasiz qoladi. Yillar o‘tgach, Nur qasos olish uchun yolg‘on, mug‘ombirlik, fitna kabi usullaridan foydalanishni o‘rganib olgan o‘gay qizini taniy olmaydi. Ammo eski dushmanlaridan tashqari, Layloning yo‘lida birinchi muhabbati ham paydo bo‘ladi.
“Chegarasiz muhabbat” (2-mavsum)
20 yil oldin yosh Xalil Ibrohim otasining o‘limiga guvoh bo‘lgan. Bolani dushmanlardan asrash uchun amakisi boshqa shaharga olib ketadi. Yillar o‘tib, Xalil Ibrohim uyiga qaytib keladi — u vayronaga aylangan uyni ta’mirlashni va bir necha yil avval unashtirib qo‘yilgan Yaseminga uylanishni rejalashtirmoqda. U eski oilaviy adovatni davom ettirish niyatida emas, biroq oila boshlig‘i Leto va uning Yaseminga oshiq o‘g‘li Tariq uning tezroq ketishini istashadi. Xalil Ibrohim maktab paytidan taniydigan, hozir esa Amerikadan qaytgan Zaynab Leto bilan uchrashganda vaziyat murakkablashadi.
“Qo‘rg‘on sirlari” (3-mavsum)
Kelishgan va ayollar sevgisini qozongan Ferit boy oilada o‘sib, hech narsadan o‘zini tiyishga odatlanmagan. Tinmay davom etadigan ziyofatlar, yangi-yangi qizlar — bu kelajak yoki hayotdagi biror-bir yutuq haqida qayg‘urmaydigan bekorchi yigitning kundalik hayoti edi.
Feritning bu yurish-turishi uning bobosi, hurmatli tadbirkor Xolis og‘ani tashvishlantiradi. Oilasini ta’minlash va munosib mavqega erishish uchun u juda ko‘p mehnat qilgan va har bir topgan tiyinning qadrini bilar edi.
Ferit sabab politsiya uyga tintuv qilishga kelganida, Xolis og‘a erka nabirasining taqdirini o‘z qo‘liga olishi kerakligini tushunadi. U o‘z ona shahri Antepadan munosib qayliq topishga qaror qiladi. Sohibjamol va jiddiy Seyran tantiq nabiraga munosib ko‘riladi. Lekin qiz sho‘x Faritni to‘g‘ri yo‘lga sola oladimi?
“Qizil sharbat” (3-mavsum)
Otasiz o‘sgan Doa universitetni bitirib, stomatolog bo‘lmoqchi. Ammo Fotih bilan tanishuvi uning hayotini o‘zgartirib yuboradi — yoshlar tezda sevib qolishadi va turmush qurishga qaror qilishadi. Fotih konservativ oilada tarbiyalangan, onasi Pembe esa uning hayotini nazorat qilishga harakat qiladi.
“Yovvoyi” (2-mavsum)
Yaman Ali to‘rt yoshigacha badavlat oilada yashagan, ammo uni yaqinlaridan ayirgan dahshatli fojia hamma narsani o‘zgartiradi. Yolg‘iz qolgan Yaman o‘ziga g‘amxo‘rlik qilishni o‘rganadi, darbadarlik, kulfat va muhtojliklarni boshdan kechiradi, o‘z atrofiga boshpanasiz bolalar to‘dasini to‘playdi. Bir kuni yigit badavlat qiz Ro‘yo bilan tanishadi. Yaman unga xizmat ko‘rsatib, yo‘qolgan oilasi yashaydigan uyga tasodifan kelib qoladi.
Izoh (0)