Toshkent shahrida 1-oktyabr – O‘qituvchi va murabbiylar kuni munosabati bilan tantanali marosim bo‘lib o‘tdi, deb xabar bermoqda Prezident matbuot xizmati xabar berdi.
Prezident Shavkat Mirziyoyev so‘zining boshida barcha taʼlim-tarbiya xodimlarini bayram bilan samimiy tabriklab, xalqimizning chuqur hurmat-ehtiromini yetkazdi.
“Biz ustozni otadek ulug‘ deb bilgan, uni hamisha boshiga ko‘tarib eʼzozlagan buyuk, maʼrifatparvar xalqning vakillarimiz. Tariximizdagi qaysi mashhur ajdodimizni olmaylik, ularning barchasi ustozlarga yuksak ehtirom bilan qaraganlariga guvoh bo‘lamiz. Ustozini, muallimini eʼzozlagan jamiyat albatta ravnaq topadi, gullab-yashnaydi. O‘qituvchisining qadr-qimmati baland bo‘lgan xalqning obro‘-eʼtibori yuksak bo‘ladi”, dedi davlat rahbari.
Hayotda har bir ezgulik, har bir kashfiyot va yutuqning zamirida o‘qituvchining mehnati, bardoshi va mehr-muhabbati mujassam ekani taʼkidlandi.
“Taʼlim – sohalar ichida eng dolzarbi, maktab – eng muhimi bo‘lsa, o‘qituvchilik kasblar orasida eng ulug‘idir. Shaxsan men o‘qituvchi deganda, o‘zim uchun aziz va qadrli bo‘lgan zotlarni, yuz-ko‘zidan nur yog‘ilib turadigan mo‘tabar insonlarni tasavvur qilaman. Ular zamonamizning eng ilg‘or kishilari, jonkuyar, vatanparvar, xalqparvar insonlardir. Shu sababli xalqimiz o‘zining eng katta boyligini – farzandlari tarbiyasini o‘qituvchilarga ishonib topshiradi”, deya taʼkidladi Shavkat Mirziyoyev.
Ustozlarning donishmandligi, hayot maʼnosini chuqur anglab, odamlarni yaxshilikka va muvaffaqiyatlarga ruhlantirishi qayd etildi.
“Insonning ongi, dunyoqarashi o‘zgarmasa, jamiyat o‘zgarmaydi. Jamiyat o‘zgarmasa, taraqqiyot ham bo‘lmaydi. Odamlarning tafakkurini, shu asosda butun jamiyatni kim o‘zgartira oladi? Yangi beruniylarni, xorazmiy va farg‘oniylarni kim kamolga yetkazadi? Bunday ulug‘vor vazifani, tom maʼnodagi tarixiy missiyani ado etishga faqat siz – ustoz va murabbiylar qodirsiz”, dedi prezident.
Bugun mamlakat o‘g‘il-qizlari xalqaro fan olimpiadalarida, sport maydonlarida ulkan marralarni qo‘lga kiritayotgani yodga olindi. Bu g‘alabalar avvalo ustoz-murabbiylarning fidokorona mehnati samarasi ekani eʼtirof etildi.
Prezidentning 27-sentyabrdagi farmoniga muvofiq, taʼlim-tarbiya tizimiga qo‘shgan munosib hissasi, sog‘lom va barkamol avlodni voyaga yetkazishdagi ibratli faoliyati hamda ijtimoiy hayotdagi faol ishtiroki uchun bir guruh yurtdoshlarimiz faxriy unvon, orden va medallar bilan taqdirlangan edi.
Marosimda ana shu mukofotlar tantanali ravishda topshirildi.
“O‘z mehnati bilan qadr topish, el-yurt ardog‘ida bo‘lish chinakam baxt. Bu, ayniqsa, o‘qituvchi va murabbiylarga yarashadi. Qadringiz ham, qaddingiz ham doimo baland bo‘lsin, aziz ustozlar”, dedi Shavkat Mirziyoyev.
Mukofotlanganlar nomidan so‘zga chiqqanlar taʼlim sohasi va muallimlarga eʼtibori, kamtarona xizmatlarini yuksak baholagani uchun davlat rahbariga minnatdorlik bildirdi.
Izoh (0)