Har ishni mukammal bajarishga urinish va doimiy o‘zini tanqid qilish holati ko‘plab mashhur insonlarga xosdir. Quyidagi yulduzlar ham “ideal men”ga erishishga jon-jahdi bilan intiladi va hatto oddiy yumushni hech kimga ishonmaydi.
Ostin Batler
Ostin Batler har bir obrazi uchun puxta tayyorgarlik ko‘rishga odatlangan. Masalan, Elvis Presli rolini ishonarli tarzda gavdalantirish uchun aktyor bir necha oy davomida qo‘shiqchining arxiv videolarini o‘rganib chiqdi:
“Men Elvis Preslining barcha chiqishlari, konsertlarini iloji boricha qayta-qayta tomosha qildim, chunki Prissilla (sobiq rafiqasi) va Liza Mari (qizi) qo‘shiqchini juda yaxshi ko‘radi. Men ularning ishonchini oqlashni istadim”, dedi aktyor.
Bundan tashqari, Batler filmdagi ovozi xonandaning ovoziga iloji boricha o‘xshash bo‘lishi uchun bir yil davomida professional vokaldan dars oldi.
Kim Kardashyan
Kardashyan doimiy ish bilan band bo‘lgani uchun uyga kam keladi, ammo shunga qaramay uy ishlarini o‘zi bajaradi. Chunki yulduz begona insonlarning uning shaxsiy hududiga kirishini istamaydi:
“Uyimda xizmatkorlar yo‘q, chunki begonalar mening shaxsiy uyimga kirishini yoqtirmayman. Ehtimol, avvalgi hayotimda uy bekasi bo‘lgandirman. Uyda qolib, garderobimni tartibga solish menga hech qanday qiyinchilik tug‘dirmaydi”, deydi Kim.
Zendeya
Odatda suratga olish maydonida murakkab tryuklarni bajarish uchun dublyorlardan foydalaniladi. Biroq Zendeya barcha kadrlarda shaxsan o‘zi ishtirok etishga harakat qiladi. Masalan, “Buyuk shoumen” loyihasida Zendeya barcha akrobatik tryuklarni o‘zi ijro etgan. Buning uchun aktrisa besh oy davomida mashq qilgan.
Devid Bekhem
Devid Bekhem ham xizmatkorlarga ishonmaydi, shuning uchun u ko‘pincha uy va hovlidagi yumushlarni o‘zi bajaradi. Futbolchi hatto mehmonxonalarga tashrif buyurganda ham yig‘ishtirishni kanda qilmaydi:
“Mehmonxonaga kirganimda, avvalo barcha narsani tartibga solaman. Stol ustidagi salfetkalar bir tekis turmaguncha men o‘zimni yengil his qila olmayman”, deydi perfektsionist futbolchi.
Yulduzning sevimli mashg‘uloti — bu muzlatgichdagi oziq-ovqat mahsulotlarini saralab, tartib bilan joylashtirishdir. Ichimliklar esa doimo juft-juft turishi kerak.
Margo Robbi
“Bobil” filmida Margo Robbi turli ziyofat va tadbirlarni sevuvchi Nelli obrazini ijro etgan. Qahramonning g‘ayratli energiyasini tomoshabinlarga yetkazib berish uchun Robbi ikki hafta davomida turli ziyofatlarga tashrif buyurdi. Keyinchalik aktrisa bunday turmush tarzi juda charchatishi va Margoga to‘g‘ri kelmasligini tan oldi.
Emma Uotson
Emma Uotsonga nisbatan salbiy izohlar kamdan-kam uchraydi, shunga qaramay, aktrisa hali ham tanqidlarga duch keladi, chunki u o‘ziga nisbatan juda talabchan va haddan tashqari qattiqqo‘ldir. Uotson o‘zining ishidan doim kamchilik izlashga va o‘zini tanqid qilishga odatlanib qolgan:
“Bolaligimdan ota-onam menga bajarayotgan ishimni hurmat qilishni va sidqidildan mehnat qilishni uqtirib kelgan. Balki shu sababli o‘zimga nisbatan eng ashaddiy tanqidchiga aylangandirman. Men kamdan-kam holatlarda kinodagi ishim natijalaridan yoki universitetdagi baholarimdan qoniqaman. Tan olaman, ba’zida o‘zimdan ham charchab qolaman”, deydi aktrisa.
Benedikt Kamberbetch
Benedikt Kamberbetch ham har bir detalga alohida e’tibor qaratadigan injiq aktyor. 2021-yilda u “It qudrati” filmida suratga tushdi. Ushbu loyiha uchun aktyor vaqtincha Montanadagi ranchoga oilasi bilan ko‘chib o‘tdi. U yerda Benedikt katta fermer xo‘jaligiga ega bo‘lgan oila bilan yashadi. Har kuni ular aktyor bilan otda sayr qilar, otga to‘g‘ri minish va kovboylik mahoratidan dars berar edi.
Bredli Kuper
Har ishni mukammal bajarishga odatlangan yana bir inson bu Bredli Kuperdir. Rejissyor nafaqat o‘ziga, balki xodimlariga nisbatan ham qattiqqo‘ldir. Masalan, “Maestro” filmini suratga olishda u syomka jamoasini begonalardan alohida qilgan. Shuningdek, Kuper ish vaqtida hech kimga o‘tirishga ruxsat bermaydi:
“Men stulda o‘tirib ishlashni yoqtirmayman. Ish vaqtida o‘tirib olish unumdorlikni pasaytiradi”, deydi rejissyor.
Izoh (0)