Tojikiston Ta’lim va fan vazirligi o‘quvchi qizlarning maktablarda do‘ppi kiyishi majburiy emasligini ma’lum qildi. Vazirlik bu tavsiyaviy xarakterga egaligini bildirdi. Bu haqda Asia-Plus xabar berdi.
Dushanbe shahrida o‘quvchi qizlarni do‘ppi kiyishga majburlash holatlari kuzatilgan. Ba’zi ota-onalar do‘ppilarning madaniy ahamiyati va issiqdan himoya qilishini ta’kidlab, buni yoqlagan. Boshqalari esa bolalarga noqulaylik tug‘dirishini aytgan.
Qizi 66-maktabda o‘qiydigan ijtimoiy tarmoq foydalanuvchisining aytishicha, rahbariyat har kuni eshik oldida turib, bosh kiyimsiz qizlarni kiritmaydi.
“To‘g‘risini aytsam, menga bu do‘ppilar yoqmaydi. Birinchidan, ular juda noqulay, ikkinchidan, har kuni faqat kimgadir yoqish uchun ularni kiyish aqlga sig‘maydi. Menimcha, 16-17 yoshli qizlarni do‘ppi kiyishga majburlamaslik kerak, chunki ular buni xohlamaydi. Bayram kunlarida kiysa bo‘ladi, ammo har kuni emas”, degan u.
Maktab direktori o‘rinbosari Sherzod Teshaboyev do‘ppi majburiy emasligini, bosh kiyimsiz qizlar maktabga kirishi taqiqlanmaganini aytdi. U 5-sinfdan 11-sinfgacha bo‘lgan o‘quvchilar do‘ppi kiyishini bildirdi.
Taʼlim va fan vazirligi esa o‘qituvchilar, maktab direktorlari do‘ppi kiyishga majburlash huquqiga ega emasligi, u faqat tavsiya etilishini ma’lum qildi.
Tojikistonda o‘quvchi qizlarning kiyim-kechagiga bir qator talablar qo‘yilgan. Ushbu me’yorlarga muvofiq, o‘quvchi qizlarga hijob, tor va yirtilgan jinsi shim, mini va tor yubka kiyish, shuningdek, yorqin makiyaj qilish taqiqlanadi. Milliy ro‘mol va do‘ppiga esa ruxsat beriladi. O‘quvchi qizlarga, shuningdek, tatuirovka qilish, reklama yozuvlari yoki boshqa mamlakatlarning davlat ramzlari aks etgan futbolkalarni kiyishga ruxsat etilmaydi.
Izoh (0)