Tezroq vazn yo‘qotish uchun internetda ko‘plab maslahatlar mavjud, ammo ozishning turli usullarini sinab ko‘rish salomatlik uchun xavfli bo‘lishi mumkin. Shu sababli professional trenerlar asta-sekinlik bilan hayotingizga bir nechta yengil odatlarni kiritish orqali ortiqcha kilogrammlardan xalos bo‘lishni tavsiya qiladi.
Iste’mol qilingan taomdan ko‘ra ko‘proq kaloriya yo‘qotishga harakat qiling
Agar organizmda parchalanadigan kundalik kaloriyalardan kamroq quvvatli mahsulotlarni iste’mol qilsangiz, tanangizda kaloriya tanqisligini hosil qilasiz. Bu holat energiya tanqisligi deb ham ataladi, chunki kaloriyalar energiya birligidir. Ko‘plab insonlar har kuni keragidan ortiq kaloriya iste’mol qiladi. Doimiy ravishda organizm qabul qilgan qo‘shimcha kaloriyalar yog‘ ko‘rinishida tanada to‘plana boshlaydi. Bu esa tabiiy ravishda vazn ortishiga olib keladi.
Agar tartibli va hisob-kitobga rioya qilgan holda kaloriya tanqisligini yaratsangiz, organizm tanada saqlanib qolgan yog‘lardan energiya ola boshlaydi. Bunday yog‘lar, asosan, oyoqning son qismida, qorin bo‘shlig‘ida to‘planadi.
Har kuni kamida 10 ming qadam yuring
Kuniga 10 000 qadam yurish o‘rta yoshdagi sog‘lom insonlar uchun oltin standart hisoblanadi. Agar bu ko‘rsatkich siz uchun murakkab bo‘lsa, umumiy salomatlikni saqlash va vazn yo‘qotish uchun kuniga 5000 qadam bosishdan boshlash mumkin. Vaqt o‘tib masofa miqdorini oshiring va kuniga 7000, keyin esa 10 000 qadamga yetkazing.
Piyoda yurish qon aylanish tizimini rag‘batlantiradi, varikoz tomirlari va arteriya bilan bog‘liq muammolar rivojlanishiga yo‘l qo‘ymaydi. Shuningdek, yurish vaqtida 500 grammgacha vazn yo‘qotish imkoniyati mavjud.
Yuqori kaloriyali ichimliklarni cheklang
Biz kundalik ichishga odatlangan mevali sharbatlar, gazlangan ichimliklar va shakar qo‘shilgan choy nazarimizda zararsiz ichimlikdek ko‘rinadi. Aslida esa ular tarkibida juda ko‘p miqdorda shakar, konservantlar va bo‘yoqlar mavjud bo‘lib, ozish jarayoniga to‘sqinlik qiladi. Shuning uchun nafaqat yeyiladigan taom, balki ichimliklarga ham e’tibor berishni unutmaslik lozim.
Eng foydali ichimlik bu suv va limon suvi qo‘shilgan gazsiz suvdir. Turli kokteyllar va shakarli ichimliklarni oyiga bir-ikki marta ichish durustdir. Chunki organizmga glyukoza moddasi ham kerak.
O‘zingiz uchun sevimli sport mashg‘uloti kashf eting
Umumiy tavsiyalarga ko‘ra, kattalar haftasiga kamida 2,5 soat jismoniy faollik bilan shug‘ullanishi kerak, mashqlarning yarmi mushaklarni mustahkamlashga qaratilgan bo‘lishi lozim. Sport salomatlik va ozishda juda muhim, u qon aylanish tizimi va metabolizmni tezlashtiradi, immunitetni mustahkamlaydi hamda , depressiyaga tushishdan asraydi.
Shuning uchun, sizga ijobiy kayfiyat beradigan biror mashqni tanlash maqsadga muvofiqdir. Masalan, yugurish, raqsga tushish, pilates, boks va boshqalar.
Ko‘proq oqsil va o‘simlik tolalariga boy mahsulotlarni iste’mol qiling
Ozishni istaydiganlarning asosiy muammosi ko‘pincha sabrsizlikdir. Ular nonushtadan bir soat o‘tgach, ochlikni his qilganda o‘zini tiya olmaydi, yoki bir bo‘lak shokolad yeb qo‘yadi, yo asabiylashgan vaqt me’yoridan ortiq ovqatlanadi. Agar siz ozishga jiddiy yondashgan bo‘lsangiz, bu odatlardan voz kechishingiz va sog‘lom ovqatlanish tartibiga o‘tishingiz kerak bo‘ladi.
Oqsilga boy mahsulotlar tanani uzoq vaqtga to‘ydiradi, o‘simlik tolalari mavjud mahsulotlar esa ichaklarni toksinlardan tozalaydi. Shuning uchun agar ko‘nglingiz shirinlik tusasa, biror ho‘l meva yeb oling.
Izoh (0)