E’tibor berganmisiz, zamonaviy supermarketlarning hech birida derazalar bo‘lmaydi yoki juda yuqori o‘rnatiladi? Katta do‘kon binosining arxitektura jihatdan bunday qurilishi avvaldan rejalashtirilgan hiyladir.
Birinchi sabab: oziq-ovqatni salqin binoda saqlash lozim
Ba’zi mahsulotlar quyosh nuri ta’sirida o‘z sifatini yo‘qotadi. Masalan, Germaniyada qurilgan birinchi supermarketlarda derazalar bo‘lgan va ochiq javonlarda turgan qandolat mahsulotlari ultrabinafsha nurlari ostida eriy boshlagan. Shuningdek, mahsulotning sifati buzilmasa-da, uning yorlig‘i quyosh ta’sirida ocharadi va yozuvlar o‘chib ketadi. Bu esa yaroqlilik muddati yaxshi bo‘lishiga qaramay, mahsulot sotilmay qolishiga olib keladi.
Ikkinchi sabab: mahsulotlarni shunday tarzda namoyish qilish oson
Derazalar o‘rnatilishi ortiqcha joyni oladi va u yerning o‘rniga boshqa mahsulotlarni terib qo‘yish imkoniyatidan mahrum qiladi. Marjin Bisvas ismli arxitektor tushuntirishicha, derazalarsiz qurilgan bino devorlari mustahkam bo‘ladi va javonlarda turli og‘irlikdagi yuklarni ko‘tara olish imkoniyatini beradi.
Uchinchi sabab: derazalarni o‘rnatish qimmatga tushadi
Derazasiz bino qurish supermarket rahbariyati uchun moliyaviy jihatdan foydaliroqdir. Chunki issiqlik va ultrabinafsha nurlanish ta’sirini kamaytiradigan maxsus oynalar o‘rnatish katta mablag‘ni talab etadi. Qurilish xarajatlarini tejashni afzal ko‘rgan tadbirkorlar supermarket binosini derazasiz qurishni afzal ko‘radi.
To‘rtinchi va eng asosiy sabab: bu sizni ko‘proq mahsulotlar sotib olishga turtki beradi
Agar do‘konlarda derazalar qo‘yilsa edi, xaridorlar mahsulotlarni tanlash vaqtida turli ishlarga chalg‘igan bo‘lar edi. Supermarketga tashrif buyurgan insonlar xuddi tashqi dunyodan ajralib, boshqa makonga tushib qolgandek bo‘ladi: tashqarida yog‘ayotgan yomg‘ir, mashinada o‘tirib onasining qaytishini kutayotgan bolalar kabilar ularni xarid qilishdan chalg‘itmaydi. Barcha diqqat va e’tibor mahsulotlarga qaratiladi. Javonlarda bir tekis va chiroyli taxlangan oziq-ovqat mahsulotlari esa ko‘zni quvnatadi va natijada biz rejalashtirgandan ko‘ra ko‘proq va ortiqcha mahsulotlarni xarid qilamiz.
Shuning uchun keyingi safar supermarketga borganda rejalashtirilmagan xaridlar qilmaslik uchun psixologlar telefonga budilnik o‘rnatish va kerakli mahsulotlar ro‘yxatini avvaldan tuzishni tavsiya qiladi.
Izoh (0)