O‘zbek sanʼatida duetdoshlar ko‘p, ammo ularning hammasini ham omadli deb bo‘lmaydi. Turli kelishmovchiliklar sabab ular uzoq vaqt birga ijod qilisholmaydi. Oybek va Nigora juftligi esa 19 yildan buyon birga ijod qilishadi. Shu bilan birga, to‘rt nafar bolani ham birgalikda tarbiya qilishmoqda.
“Otam o‘g‘il farzand ko‘rishni istagan”
Nigora Ismoilova 1988-yilning 12-sentyabr kuni Toshkent shahrida ishchilar oilasida dunyoga kelgan. U to‘rtinchi qiz farzand, uning uchta opasi va bir ukasi bor.
— Otam rahmatli avtobus haydovchisi bo‘lgan. Onam esa bolalar shifokori bo‘lib ishlagan. Ular katta daromadli sohada ishlashmagan bo‘lsa ham, besh farzandni birovdan kam qilmay katta qilishgan. Oilada to‘rtinchi qiz farzand bo‘lganman. Otam rahmatli har gal “Qiz tug‘iladi”, degan xabarni eshitganida ranjigan ekan. O‘g‘il farzand ko‘rishni judayam istagan ekan. Hatto mening ham qiz bola ekanligimni eshitib “Kasalxonadan olib chiqishga bormayman, o‘zing kelavergin”, deb gapirgan ekan. Ammo onam “Baribir ko‘ngli bo‘lmay, kasalxonaga kelgan, sizlarni yaxshi ko‘rardi”, derdi. Ammo ukam Zohidjon tug‘ilgan kunni opalarim juda yaxshi eslashadi. Quvonganlaridan “O‘g‘illi bo‘ldim”, deb emaklab uyga kirib kelgan ekan, deydi Nigora.
“Uch yoshimdan sahnaga intilganman”
Nigora Ismoilovaning oilasida sanʼatkorlar bo‘lmasa-da, bolalikdan qo‘shiq aytishga qiziqadi. Uch yoshidan sahnaga intilganini quyidagicha eslaydi.
— Uch yoshga qadam qo‘yar-qo‘ymasimdan bolalar bog‘chasiga, keyin 1995-yil 179-o‘rta maktabga borganman. Maktabda juda aʼlochi bo‘lmasam-da, bayram tadbirlarida qatnashishga juda qiziqar edim. O‘sha kezlarda mahallamizda Fotima va Zuhra Ziyomuhamedovalar boshchiligidagi noanʼanaviy bolalar qo‘shiqchilik tanlovi o‘tkazildi. Tanlovning noanʼanaviyligi shundaki, u yerda sog‘lom bolalar bilan bir qatorda, ko‘zi ojiz va nogiron bolalar ham o‘zlarining isteʼdodlarini sinab ko‘rishlari mumkin edi. Tabiiyki, musiqaga qiziqishim kuchli bo‘lgani sababli tanlovda ishtirok etdim. Omadim kelibmi, tanlovda g‘olib bo‘ldim.
So‘ngra tanlab olingan bolalar jamoasidan xor tashkil qilindi va “Uzbell” deb nom berildi. Xor jamoada biz qo‘shiqchilik sirlarini o‘rgandik. Bu yerda men juda ko‘plab do‘stlar orttirdim. Xonanda Ziyoda bilan ham aynan shu yerda tanishganman. U bo‘sh vaqtlarida “Tantana” guruhi haqida gapirib berar edi. O‘z-o‘zidan menda shu guruhning aʼzosi bo‘lish istagi paydo bo‘ldi. Bir kuni xor jamoamiz nomaʼlum sabablarga ko‘ra yopildi. Juda hafa bo‘ldim, lekin Fotima va Zuhra opalar meni “Tantana” guruhiga taklif qilishganida o‘zimda yo‘q xursand bo‘lib ketdim, deydi xonanda.
“Bog‘chada ishlaganman”
Oybek va Nigora juftligidagi Nigora maktabni tamomlagandan so‘ng bir muddat bog‘chada enagalik qilgan.
— Oilamiz kamtarona hayot kechirgan. Otam rahmatli avtobus haydovchisi, onam esa bolalar shifokori bo‘lgan. Maktabni tamomlagach, bir muddat bog‘chada enagalik ham qilganman. Bolalar bilan tez til topishganim uchun qiynalmaganman. Birinchi maoshimni olganimda ota-onam rosa xursand bo‘lishgan. O‘zim ishlab topgan pulga osh masalliqlarini olib, oila a’zolarimni xursand qilgandim, deydi xonanda Nigora.
“Akfa Mediaga tanish-bilishsiz qabul qilinganmiz”
Nigora “Tantana” bolalar guruhi bilan ko‘plab konsert dasturlarida ishtirok etadi. Maktabni tamomlab ustozlarining tavsiyasi bilan musiqa kollejiga o‘qishga kiradi. Ikkinchi kursda o‘qiyotganida esa ustozlari unga prodyuserlik kompaniyasi o‘tkazayotgan kastingda ishtirok etishni taklif qilishadi.
— Kasting haqida musiqa kollejidagi ustozimdan eshitib qolganmiz. O‘shanda Nigora ikkimiz darsdan chiqib, “Akfa” kompaniyasini izlab borganmiz. Avvaliga kasting haqida ota-onamga aytmaganman. Chunki ular qarshi bo‘lishlarini avvaldan taxmin qilgandim. Aksiga olib kasting topshiriladigan kun tomog‘im bo‘g‘ilib qolgan. O‘shanda Samandar Hamroqulov va kompaniya rahbarlari hayʼat aʼzosi bo‘lgandi. Nigora sinovdan o‘tgan, ammo meni qabul qilishmagan, deya eslaydi xonanda Ziyoda.
Nigora esa tanish-bilishsiz kastingdan o‘tganini va ovozi undan kuchli qizlar juda ko‘p bo‘lganini eslaydi.
— Ovozimning imkoniyatlari juda kam, buni yaxshi bilaman. Baland pardalarda kuylay olaman, deb maqtanolmayman. Kastingda iqtidorli qizlar ko‘p edi, ammo omad menga kulib boqqan. Hech qanday tanish-bilishsiz qabul qilinganman. Ammo menga Oybek bilan birga kuylash yoqmagan. Ilk bora Oybek bilan kuylagan “Izlayman” duet qo‘shig‘i ko‘pchilikka manzur bo‘ldi. Shundan so‘ng rahbariyatimiz yana bir duet qo‘shiq yaratish taklifini bildirishdi va “Sen uchun” nomli qo‘shiq dunyoga keldi. Unga ham o‘z navbatida klip suratga olinib, xalqimizga taqdim qilindi. Qisqa vaqt ichida qo‘shiq ommalashib, hit-paradlarning yuqori pog‘onasiga ko‘tarildi. Shundan so‘ng men va Oybekni Oybek va Nigora duet guruhi sifatida taniy boshlashdi, deydi xonanda Nigora.
“Hamkorlik chiroyli yakunlanmadi”
Oybek va Nigora juftligi 2008-yili “Nihol” nomidagi davlat mukofotini qo‘lga kiritishdi. Hit qo‘shiqlarning ham keti uzilmayotgandi. Ammo 2010-yil prodyuserlik kompaniyasi va unda ijod qiluvchi xonandalar o‘rtasiga sovuqchilik tushdi.
— O‘sha paytda “Akfa Media”dan qattiq ranjigandik. Chunki chiroyli yakun bo‘lmadi, qancha pul topayotganimizni bilardik. Yana qaytadan hammasini izga solish oson bo‘lgani yo‘q. O‘sha kungacha biz bilan hamkorlik qilib kelgan ijodkorlardan “Bo‘ldi, bularning puli yo‘q, ular bilan ishlash befoyda”, degan gaplarni eshitdik. Yangi qo‘shiqlar yaratardik, ammo ularga klip olib, ommaga taqdim etishga imkonimiz bo‘lmasdi. O‘sha paytda gina-kuduratlar bo‘lgan, hozir esa “Akfa Media”dan faqat minnatdormiz. Chunki ular sabab Oybek va Nigora juftligi paydo bo‘ldi va brendimiz odamlar orasida tanildi, deydi xonanda.
“Oybekka turmushga chiqmayman”
Nigora oila qurmasdan avval nima uchun jurnalistlarning “Oila qurasizlarmi?” degan savoliga rad javobini berganini quyidagicha izohladi.
— Oybek biror marta meni yolg‘iz qoldirmagan. Hamisha birga edik, uning eʼtibor berishini sezardim. Ammo biror marta ko‘nglidagilarni ochiqchasiga aytmasdi. Shu bois jahlim chiqib, “Sizga turmushga chiqmayman, ko‘zimga ko‘rinmang”, derdim. Eng qizig‘i, bu gaplarimga ham eʼtibor bermasdi. Oilamiz ham avvaldan yaqin munosabatda bo‘lgan, deydi Nigora.
“Yaxshi kelin bo‘lmaganman”
Xonanda Nigora ochiqchasiga yaxshi kelin bo‘lmagani va o‘g‘illari o‘zidek kelin bilan oila qurishlarini istamasligi haqida aytgan.
— Hamma ishni uddalashga harakat qilardim, ammo oila qurgandan keyin ko‘p o‘tmay to‘y-xizmatlariga chiqib ketishimga to‘g‘ri kelgan. Yarim kechagacha xizmatda bo‘lardik, tabiiyki, keyin tushgacha uxlardik. Ammo to‘ydan keyin bir hafta kelinlik vazifalarimni bajarib, soat tonggi beshda ko‘cha-hovlilarni supurganman. Ko‘pchilik “Sizga havasim keladi, kelinim sizdek bo‘lsin”, desa gapingizni qaytarib oling, deb kulaman. Hatto o‘g‘illarimga ham mendek kelin kelishini istamayman, deyman hazillashib, deydi Nigora.
Oybek va Nigoraning to‘rt nafar farzandi bor. Ular ijodda avvalgidek faol emas, yaʼni tez-tez yangi qo‘shiq va kliplarini taqdim etishayotgani yo‘q. Ammo omma eʼtiboridan chetda ham qolishmagan. Ular chaqaloqlarni kutib olish marosimlarida faol ishtirok etishadi.
Izoh (0)