AQSH ma’muriyati Rossiya uranini olib kirishga qo‘yilgan taqiqning buzilishi ehtimoli munosabati bilan Xitoydan uran yetkazib berilishini tekshirmoqda.
Reuters nashriga ko‘ra, Vashington Xitoy Rossiyadan boyitilgan uran import qilayotgani va shu bilan birga AQSHga o‘z mahsulotlari eksportiga shubha qilmoqda.
“Biz Rossiya uranini olib kirishga qo‘yilgan taqiq chetlab o‘tilgan bo‘lishi mumkinligidan xavotirdamiz”, deyiladi Amerika uran ishlab chiqaruvchilar uyushmasi (UPA) bosh lobbichisi Jon Indallning bayonotida.
Unga ko‘ra, tashkilot AQSH Savdo vazirligiga audit o‘tkazish iltimosi bilan murojaat qilgan.
Qo‘shma Shtatlar Rossiyaning Ukrainaga qarshi urushni davom ettirish qobiliyatini zaiflashtirish maqsadida Rossiya uraniga qarshi sanksiyalar kiritgan edi. Shu bilan birga, Xitoydan Amerika Qo‘shma Shtatlariga boyitilgan uran yetkazib berish keskin oshgan, buni Amerika savdo agentligi ma’lumotlari tasdiqlagan.
Xitoydan AQSHga 2023-yilning birgina dekabr oyida deyarli 243 tonna boyitilgan uran import qilingan. Bundan tashqari, 2020-yildan 2022-yilgacha bo‘lgan davrda Pekin ushbu turdagi mahsulotni AQSHga umuman yetkazib bermagan. 2022-2023-yillarda Xitoyning Rossiyadan boyitilgan uran sotib olishi sezilarli darajada oshgan.
2024-yil sentyabr oyida Rossiya prezidenti Vladimir Putin uran, titan va nikel eksportini taqiqlash ehtimolini e’lon qilgan.
Izoh (0)