AQSH davlat kotibi Entoni Blinken Amerika rasmiylarining Livanda “Hizbulloh” harakati a’zolari tomonidan foydalaniladigan peyjerlarning portlashiga aloqasi yo‘qligini ta’kidladi.
“Livanga kelsak, AQSH bu voqealardan xabari bo‘lmagan va ularga aloqador ham emas. Biz hali ham ma’lumot va faktlarni to‘playapmiz”, dedi u Qohirada Misr tashqi ishlar vaziri Badr Abdul Ati bilan o‘tkazilgan matbuot anjumanida.
“Biz barcha tomonlar G‘azodagi mojaroni yanada kuchaytirishi mumkin bo‘lgan qadamlardan qochishlari muhimligini avval ham aytganmiz”, deya qo‘shimcha qildi AQSH davlat kotibi.
Avvalroq Livan ommaviy axborot vositalarida portlagan peyjerlarning har birida 20 grammdan portlovchi modda borligi haqida ma’lumot paydo bo‘lgan edi.
Bir kun oldin Livandagi “Hizbulloh” shia harakati a’zolari tomonidan foydalaniladigan peyjerlar bir vaqtning o‘zida Livanning turli hududlarida portladi. Yaqin Sharq OAV Livan Sog‘liqni saqlash vazirligiga tayanib, portlash oqibatida kamida 11 kishi halok bo‘lgani, 4 mingga yaqin kishi jarohatlangani, ulardan 400 nafarining ahvoli og‘ir ekani haqida xabar qildi.
Tayvanning Gold Apollo kompaniyasi asoschisi Su Tsingkuan jurnalistlarga kompaniya Livanda portlagan peyjerlarni ishlab chiqarmaganini aytdi. Unga ko‘ra, portlagan peyjerlar Tayvan brendidan foydalanish huquqiga ega Yevropa kompaniyasi tomonidan ishlab chiqarilgan, biroq u kompaniyaning nomini aytmagan.
Keyinchalik Gold Apollon kompaniyasi peyjerlar uning uzoq yillik hamkori, Budapeshtda joylashgan Vengriyaning BAC Consulting KFT kompaniyasi tomonidan ishlab chiqarilganiga aniqlik kiritdi.
Izoh (0)