Koinotga chiqqan ilk sayyohlar Yerga qaytdi (video)

Polaris Dawn xususiy kosmik missiyasi ekipaji tarixdagi ilk bor sayyohlarning koinotga chiqishini amalga oshirib, Yerga qaytdi.

15-sentyabr kuni ichida to‘rt kishi bo‘lgan Dragon kapsulasi Florida yaqinidagi Meksika ko‘rfazining suvlariga parashyut bilan tushdi. Polaris Dawn’ning birinchi tijoriy tadqiqot missiyasi 10-sentyabr kuni boshlangandi. Birinchi kuni SpaceX Polaris Dawn missiyasi doirasida sayyohlar kapsulani orbitada qoldirib, koinotga muvaffaqiyatli chiqqandi. Ular kosmosda taxminan 15 daqiqa qolgan. 

Ekipaj tarkibiga SpaceX bilan birga Polaris missiyasini moliyalashtirgan milliarder Jared Ayzekman, AQSH Harbiy-havo kuchlarining iste’fodagi podpolkovnigi Skott Potet,  SpaceX’ning ikki xodimi — kosmik operatsiyalar bo‘yicha yetakchi muhandis Anna Menon va astronavtlarni tayyorlash bo‘yicha muhandis Sara Gillis bo‘lgan.

11-sentyabr kuni Polaris Dawn missiyasi Yer orbitasi bo‘ylab 1400 kilometr balandlikka ko‘tarilib, rekord o‘rnatdi. Avvalgi rekord 1373 kilometr bo‘lib, Gemini-11 boshqariladigan havo kemasiga tegishli edi. Polaris Dawn, shuningdek, ayol tomonidan kosmosga amalga oshirilgan eng uzoq sayohatga aylandi.