Jahon miqyosida mashhurlikka erishgan yulduzlar ekran ortidagi haqiqiy hayoti qanday ekanligi barchaga qiziq. Ba’zan sahnada biz ko‘rishga muvaffaq bo‘lgan voqealardan ham ko‘prog‘ini bilish imkoniyati tug‘iladi. Bugun biz Beyonse hayoti haqida so‘zlashamiz.
Xonanda kuni kecha GQ jurnaliga katta intervyu berdi. Suhbat davomida u o‘z hayoti haqida batafsil so‘zlab berdi. Beyonse o‘zining Cowboy Carter nomli bahorgi albomi haqidagi taassurotlari hamda shaxsiy hayoti haqida qiziqarli ma’lumotlar bilan bo‘lishdi:
“Men shu kunga qadar bajargan ishlarimdan faxrlanaman, ammo shu bilan birga men va oilam qanday qurbonliklarni boshidan o‘tkazganini anglayman va tan olaman. Bilasizmi, men uchun hayotdagi eng katta mukofot bu qalbimdagi quvonch hissidir. Agar men yozgan musiqalar insonlarni erkin fikrlashga va imkonsiz narsaga yo‘qligiga ishontirsa, bu men uchun ulkan sovg‘adir”.
Shuningdek, Beyonse tig‘iz kun tartibi va doimiy band ish jadvaliga qaramay ko‘p farzandli ona rolini ham yaxshi bajarayotgan yulduzlardandir. Axir, tugamas sayohatlar va gastrol safarlarida bo‘ladigan xonanda uchun yaxshi ona maqomini saqlab qolish oson emas. Beyonse karyerasi, tadbirkorlik ishlari va mashhurligiga qaramay, uning oilasi va farzandlari xonanda hayotidagi eng ustuvor vazifadir:
“Ish jadvalimni tuzishda men oiladagi rejalarga e’tibor qarataman. Bolalarim maktabda bo‘lmagandagina gastrollarga borishga harakat qilaman, chunki har doim oilam bilan birgalikda dunyoni kezishni, farzandlarimni turli tillar, arxitektura va turmush tarzi bilan tanishtirishni orzu qilganman.
Uch farzandni tarbiyalash oson emas. Yoshi ulg‘aygani sari bolalarning o‘ziga xos ehtiyojlari, sevimli mashg‘ulotlari paydo bo‘ladi, ijtimoiy hayotga kirib keladi va shu tariqa mustaqil shaxslarga aylana boshlaydi. Bularning bariga ahamiyat berish lozim. Mening egizaklarim esa Parvardigor menga bergan eng buyuk tuhfadir”, — deydi xonanda.
Muxlislarda savol tug‘iladi: Beyonse qanday qilib barcha ishlarga ulguradi va namunali ona maqomini saqlab qoladi? Yulduzning so‘zlariga ko‘ra, hamma gap musiqada. Qiyin damlarda musiqa Beyonsega kuch va motivatsiya beradigan mayoqqa aylanadi:
“Qo‘shiq kuylash meni tinchlantiradi, yurak urishimni mo‘tadillashtiradi. Musiqa men uchun dofaminning eng yaxshi manbaidir. Zero xonandalik men uchun ish emas, balki sevimli mashg‘ulotimdir. Men musiqani yaratishni, qo‘shiq aytishni chin dildan yaxshi ko‘raman. Murakkab kunlarda, qayg‘uga tushgan vaqtlarimda, kasal bo‘lib qolganimda yoki uyqusiz tunlar tufayli stressga tushganimda qo‘shiq aytaman. Va ko‘pincha yolg‘iz qo‘shiq aytaman”, — deydi Beyonse.
Beyonse jismonan sog‘lom bo‘lishga ham doimo harakat qiladi. Xonanda har tomonlama o‘z ustida ishlash lozim deb biladi:
“Men sog‘lig‘imga doimiy e’tibor berishga harakat qilaman, buning uchun ozuqaviy qo‘shimchalar qabul qilaman va sog‘lom ovqatlanish tartibiga amal qilaman. Masalan, bu yil yozda men butunlay go‘sht yeyishdan voz kechdim, istisno tariqasida faqat kurka go‘shti iste’mol qilishim mumkin. Endilikda jismonan yanada mukammal bo‘lish uchun sport mashqlarini boshlashim kerak. Hozircha bunga vaqt topa olmayapman, balki ertaga boshlarman?”.
Izoh (0)