Apple o‘g‘irlangan qismlar o‘rnatilgan iPhone’larni bloklaydi

Apple ta’mirlash vaqtida o‘g‘irlangan qurilmalarning qismlari o‘rnatilgan iPhone’larni bloklaydi. Bu haqda 9to5Mac profil nashri xabar berdi.

Yangi funksiya 16-sentyabrda chiqarilishi rejalashtirilgan iOS 18 da taqdim etiladi. Ma’lum bo‘lishicha, endilikda iPhone komponentlarining — batareya, kamera, ekran seriya raqamlari haqidagi ma’lumotlar foydalanuvchi hisobiga ulanadi.

Agar ta’mirlangan qurilma yoqilganda, o‘rnatilgan yangi qism Activation Lock yoki Lost Mode funksiyalari faollashtirilgan iPhone’dan olinganligi aniqlansa, foydalanuvchi uni qulfdan chiqarish uchun parolni kiritishi kerak bo‘ladi.

iOS 18 Apple bir necha kun oldin taqdim etilgan yangi iPhone 16 seriyali modellarida oldindan o‘rnatiladi. Ularning sotuvi 20-sentyabrdan boshlanadi.