Aldov yo‘li bilan Rossiya Mudofaa vazirligi bilan shartnoma tuzishga majburlanib, Ukrainadagi urushga jo‘natilgan 45 nafar Hindiston fuqarosi Rossiya armiyasi safidan chetlashtirilib, jangovar hududdan olib chiqildi. Bu haqda Hindiston TIVga tayanib NDTV xabar berdi.
Idora maʼlumotlariga ko‘ra, yana 50 nafar Hindiston fuqarosi frontda qolmoqda. Mamlakat Tashqi ishlar vazirligi ularni “ozod qilish uchun harakat qilmoqda”.
Iyul oyida NDTV telekanali Hindiston bosh vaziri Narendra Modi va Rossiya prezidenti Vladimir Putin Ukrainadagi urushda aldanib qolgan hindistonlik fuqarolarni Rossiya armiyasi safidan chetlashtirishga kelishib olgani haqida xabar bergan edi. Telekompaniya suhbatdoshlarining ta’kidlashicha, Moskva hindlarni nafaqat armiyadan bo‘shatishga, balki ularning vatanlariga qaytishini osonlashtirishga ham rozi bo‘lgan.
Avvalroq “Dojd” Rossiya tomonidan 90 nafardan ortiq hindistonlik Ukrainaga aldov yo‘li bilan urushga yuborilgani, ulardan kamida sakkiz nafari halok bo‘lgani va ularning jasadlari hali ham o‘z vataniga qaytarilmagani haqida xabar bergan edi.
Hindiston parlamenti deputati Vikramjit Singx Sahneyb so‘zlariga ko‘ra, Ukraina bilan urushga yuborilayotgan Hindiston fuqarolarining aksariyati ish bilan ta’minlash bahonasida Rossiyaga taklif qilinib, keyin esa tarjimonlarsiz Rossiya Mudofaa vazirligi bilan shartnoma imzolashga majbur qilingan.
Hindiston huquq-tartibot idoralari mamlakatning to‘rt nafar fuqarosini odam savdosi tarmog‘iga aloqadorlikda gumon qilib hibsga olgani haqida ma’lum qilgan. Mahalliy maxsus xizmatlar maʼlumotlariga ko‘ra, ushbu tarmoq aʼzolari yigitlarni aldab Rossiyaga jo‘natgan va u yerda Ukrainaga qarshi urushda qatnashishga majbur qilgan.
Izoh (0)