O‘zbekistonda yana baliq oviga ruxsat berilib, baliqxo‘rlik mavsumi boshlandi. Mavsum boshi bo‘lgani boismi, ayni kunda poytaxtdagi ko‘plab yemakxonalarda xo‘randalarning asosiy tanlovlaridan biri bo‘lgan zog‘ora (sazan) balig‘i ham hamyonbop narxlarda sotilmoqda. Nari borsa 90-100 ming so‘mdan xo‘randalarga tortilayotgan zog‘ora baliq O‘zbekistondagi eng yirik baliq bozorlaridan biri — Chinoz baliq bozorida holatiga qarab 20-28 ming so‘mdan 45-50 ming so‘mgacha sotilmoqda. “Daryo” jurnalisti ushbu bozorda bo‘lib, ayni kunda bozorda sotilayotgan baliqlar narxi bilan qiziqdi.
“Bu bozorga 2 turdagi — Aydar Arnasoy ko‘lidan tutilgan va baliqchilik xo‘jaliklarida yetishtirilgan baliqlar olib kelinadi. Ko‘ldan tutilgan baliqlarning narxi ancha qimmatroq bo‘ladi. Baliqchilik xo‘jaliklarida yetishtirilgan baliqlar esa ularga nisbatan ancha arzon sotiladi”, deydi baliq sotuvchilaridan biri.
Suhbatdoshning ma’lumot berishicha, tabiiy havzalardan tutilgan Afrika laqqa baliqlarining ayni kundagi narxi 28 ming so‘mdan boshlanadi. Vazni katta laqqa baliqlar esa 50 ming so‘mgacha sotilmoqda.
“Umumiy og‘irligi 6 kilogrammgacha bo‘lgan Afrika laqqa baliqlari ba’zi sotuvchilar tomonidan 20-25 ming so‘mdan ham sotilmoqda. Mavsum boshi bo‘lgani uchunmi, bozorda narxlar ancha arzon. Masalan, zog‘ora (sazan) baliqning kattarog‘i 20-25 ming so‘mgacha ham sotilmoqda”, deydi u.
Yangi Chinoz baliq bozori mas’ullaridan biri Rustam Qodirovning jurnalistga ma’lumot berishicha, bozorda ayni kunda laqqa, cho‘rtan, karas, do‘ngpeshona (tolstolobik), zog‘ora, amur, ilon baliq kabi turlari sotilmoqda.
“Bozorimiz mavsum boshidan beri ertalabdan kechgacha davom etmoqda. Kuniga 40-50 tonna baliq sotilmoqda. Vodiy viloyatlaridan kelayotganlar, shuningdek, tabiiy havzalardan baliq tutuvchilarning taklifiga ko‘ra, endilikda bozorni kechki payt 4-5 larda boshlashni rejalashtirib turibmiz. Sababi vodiy viloyatlaridan keluvchilar tongda bemalol yo‘lga chiqib, bozor boshlanguncha kirib kelishsa, tabiiy havzalardan baliq tutuvchilar esa tong paytida sovuq suvga kirishdek mashaqqatdan qutiladi. Ertalab bemalol baliq oviga chiqib, bozor boshlanguncha ancha baliq tutib kelishadi”, deydi Rustam Qodirov.
Baliq sotuvchilaridan birining aytishicha, ayni kunda zog‘ora baliqlarni tabiiy havzalardan tutish qiyin. Bozordagilari asosan baliq havzalarida yetishtirilgan baliqlar hisoblanadi. Mo‘ylovli laqqa baliqlarini esa tabiiy havzalardan topish mumkin. Biroq u juda xaridorgir bo‘lgani bois, ko‘plab sotuvchilar baliq havzalarida yetishtirilgan mo‘ylovi ko‘p laqqalarning mo‘ylovini kesib tashlab, toq mo‘ylov qilgan holda xaridorlarni aldab sotishni odat qilgan.
“Suv havzasidan tutilgan mo‘ylovchi laqqa baliqda bitta mo‘ylov bo‘ladi. Baliq havzalarida yetishtirilgan laqqa baliqlarda esa mo‘ylov ko‘p bo‘ladi. Bu baliq xaridorgir bo‘lgani bois, ayrim sotuvchilar suv havzalarida yetishtirilgan laqqa baliqlarning mo‘ylovini kesib tashlab, xaridorlarga suv havzalarida tutilgan baliq, deya aldab sotmoqda. Xaridorlar shunga juda e’tiborli bo‘lishlari kerak”, deydi baliq sotuvchi.
Bozor rahbariyatining bildirishicha, baliq bozoriga keltirilgan baliqlar avvaliga hududdagi laboratoriya tekshiruvlaridan o‘tkazilib, iste’molga yaroqliligi o‘rganiladi. Shundan so‘ng sotishga ruxsat beriladi.
-qwgABJJJ.jpg)
“Ayni kunda har bir sotuvchi taxminan bir tonnadan baliq sotmoqda”, deydi Rustam Qodirov.
Izoh (0)