Ukrainadagi mojaro tufayli joriy qilingan sanksiyalar G‘arb davlatlariga tabiiy uran yetkazib berishni sezilarli darajada murakkablashtiradi. Bu haqda Financial Times (FT) nashriga Qozog‘istonning Kazatomprom milliy kompaniyasi boshqaruvi raisi Meirjan Yusupov ma’lum qildi.
“Biz uchun mahsulotlarimizni osiyolik hamkorlarga sotish ancha oson. Ular deyarli barcha mahsulotlarimizni sotib olishlari mumkin. Ularga sotish ancha oson, lekin biz “barcha tuxumlarimizni bitta savatga joylamoqchi” emasmiz. Biz savdo geografiyasini diversifikatsiya qilishga juda jiddiy qaraymiz”, ta’kidladi Meirjan Yusupov.
![](/static/2024/09/10/kazatomprom123-XJBgru7p.jpg)
Nashrning ta'kidlashicha, aksiyalari Ostona va Londonda joylashgan “Kazatomprom” Xitoy, Qozog'iston, Kaspiy dengizi, Ozarbayjon, Gruziya orqali o'tuvchi Transkaspiy xalqaro transport yo'lagi bo'ylab yetkazib berishni kengaytirishga intilmoqda.
Financial Times ta'kidlashicha, kompaniya o'tgan oy 2025-yil uchun ishlab chiqarish prognozini 17 foizga qisqartirgan va 2026-yil uchun prognozni to'xtatgan. Meirjan Yusupov o‘z intervyusida uran qazib olish uchun zarur bo‘lgan sulfat kislota tanqisligi hamda quruqlikdagi inshootlar va infratuzilma qurilishidagi kechikishlarni tilga oldi.
Oxirgi yillik hisobotga ko‘ra, o‘tgan yili “Kazatomprom” uranning 49 foizini Osiyo bozoriga, 32 foizini Yevropaga va 19 foizini Amerika bozoriga jo‘natgan.
Qozog‘iston milliy kompaniyasi dunyodagi eng yirik tabiiy uran ishlab chiqaruvchilardan biri bo‘lib, barcha uran mahsulotlarining 43 foizi mazkur kompaniya hissasiga to‘g‘ri keladi.
Izoh (0)