O‘zLiDeP tadbirkorlar uchun litsenziyalar sonini 2 baravarga qisqartirish tashabbusini ilgari surmoqda

Tadbirkorlar va ishbilarmonlar harakati – O‘zbekiston Liberal-demokratik partiyasining I Kongressida partiyaning avvalgi saylovoldi dasturidagi ustuvor vazifalar sarhisob qilindi.

Joriy yilning 27-oktyabr kuni bo‘lib o‘tadigan Oliy Majlis Qonunchilik Palatasi va xalq deputatlari mahalliy Kengashlariga saylov jarayonlari o‘zining muhim pallasiga kirib bormoqda. Saylovlarda qatnashuvchi siyosiy partiyalar o‘zlarining o‘tgan davrda ilgari surgan tashabbus va takliflarining amalga oshirilishini sarhisob qilish bilan birgalikda, yangi saylovoldi dasturlarini eʼlon qilmoqdalar.

7-sentyabr kuni O‘zbekistonning siyosiy sahnasida eng ko‘p sonli aʼzolar va tarafdorlariga ega bo‘lgan, farovon hayotni taʼminlashda yetakchi o‘ringa ega xalqchil partiyaga aylana olgan O‘zLiDePning I Kongressi bo‘lib o‘tdi. Unda partiyaning o‘tgan 5-yillik faoliyati tahlili, istiqboldagi rejalari muhokama qilindi

Taʼkidlanishicha o‘tgan davr mobaynida O‘zLiDePning eng yorqin tashabbuslaridan biri Konstitutsiyamizni isloh qilish g‘oyasi bilan siyosiy maydonga chiqqanligi va yangi normalar «inson – jamiyat – davlat» konsepsiyasiga qatʼiy amal qilingan holda tayyorlanganligi bo‘ldi.

O‘zLiDeP fraksiyasi deputatlari partiya saylovoldi dasturidagi maqsad va g‘oyalarini amalga oshirishga qaratilgan 200 dan ortiq qonunlar qabul qilinishida faollik ko‘rsatiganligi, shu bilan birga 41 ta qonun loyihalarini ishlab chiqishda fraksiya deputatlari tashabbuskor bo‘lganligi alohida eʼtirof etildi. Xususan, Soliq, Bojxona, Yer va Shaharsozlik kodekslari yangicha biznes muhitini rag‘batlantiradigan normalar bilan boyitilib, yanada liberallashtirilishiga erishilganligi taʼkidlandi.

Kongress ishi davomida partiyaning kelgusi besh yillikdagi muhim strategik hujjati bo‘lgan yangi Saylovoldi dasturi loyihasi muhokama qilindi. Dastur “O‘zbekiston – 2030” strategiyasini to‘liq amalga oshirishni nazarda tutuvchi 5 maqsad – 500 vazifani o‘z ichiga qamrab olganligi maʼlum qilindi.

Partiya liberal tamoyillarga asoslangan erkin bozor munosabatlarini qo‘llab-quvvatlovchi tashabbuslarga sodiq qolgan holda, biznes yuritishni yanada soddalashtirish, litsenziyalar sonini 2 baravarga qisqartirish, mingga yaqin byurokratik talablarni bekor qilish, soliq maʼmurchiligini soddalashtirish, tadbirkorlar uchun soliq to‘lashda adolatli sharoitlar yaratish kabi vazifalarni belgilab olmoqda.