Ukraina Kursk viloyatidagi operatsiya yordamida Rossiyaning yangi hujumini oldini olmoqchi edi. Ukraina armiyasining bunday harakatlari Sumi viloyati aholisini himoya qilishga qaratilgan. Bu haqda Ukraina Qurolli kuchlari bosh qo‘mondoni Aleksandr Sirskiy CNN’ga bergan intervyusida ma’lum qildi.
Generalning so‘zlariga ko‘ra, Kursk viloyatidagi asosiy operatsiyalar quyidagilardan iborat:
- Rossiyaning Kursk viloyatidan yangi hujum uchun tramplin sifatida foydalanishiga yo‘l qo‘ymaslik;
- rus qo‘shinlarini boshqa yo‘nalishlardan chalg‘itish;
- xavfsizlik zonasini yaratish va fuqarolik obyektlari o‘qqa tutilishning oldini olish;
- rus harbiylarini qo‘lga olish;
- Ukraina qo‘shinlari va butun xalqning ruhiyatini ko‘tarish.
Shuningdek, Sirskiy Ukraina Qurolli kuchlarining operatsiyasi Rossiyani Kursk viloyatiga o‘n minglab harbiylarini yuborishga majbur qilganini eslatdi. Ular orasida Rossiyaning eng yaxshi havo-desant kuchlari bo‘linmalari jangchilari bor.
Ukraina prezidenti Vladimir Zelenskiyga ko‘ra, Kursk viloyatidagi bir oylik operatsiyasi davomida Rossiyaning 6 ming askari halok va yarador bo‘ldi. Armiya yuzdan ortiq aholi punktlarini o‘z ichiga olgan 1300 kvadrat kilometrdan ortiq hudud ustidan nazorat o‘rnatdi.
Izoh (0)