AQSH va Yevropa Ittifoqi o‘rtasida Ukrainaga iyun oyida tasdiqlangan 50 milliard dollarlik kredit bo‘yicha kelishmovchiliklar davom etmoqda.
Endilikda Oq uyning amaldagi rahbari Jo Baydenning prezidentlik poygasidan chiqishi tufayli bu kelishmovchiliklar kreditning uzilishiga olib kelishi mumkin, dedi Politico nashriga ism-sharifini oshkor etmagan ikki yevropalik amaldor.
Politico nashrining yozishicha, Amerika va Yevropa rasmiylari Respublikachilar partiyasidan prezidentlikka nomzod Donald Tramp g‘alaba qozonsa, mablag‘ ajratishga xalaqit berishidan qo‘rqishgan. Shu sababli, ular davom etayotgan kelishmovchiliklarga qaramay, kreditni tezlashtirishga qaror qilishgandi.
Biroq Baydenning nomzodi vitse-prezident Kamala Harris bilan almashtirilishi vaziyatni o‘zgartirdi. Yevropa va Amerika rasmiylari, Politico suhbatdoshlariga ko‘ra, Harrisning g‘alabasiga ishonchi komil va endi shoshilinch kreditga ehtiyoj sezmayapti.
Iyun oyida AFP va Bloomberg Yelisey saroyidagi manbaga tayanib, kredit Ukrainaga shu yil oxirigacha berilishi kerakligini yozgan edi. Uni Rossiyaning muzlatilgan aktivlaridan olinadigan foyda hisobiga qoplash rejalashtirilgan.
Muzlatilgan Rossiya aktivlarining uchdan ikki qismidan ko‘prog‘i Belgiya depozitari Euroclear hisoblarida saqlanadi. 2023-yilda ushbu mablag‘lar 4,4 milliard yevro foyda keltirdi.
AQSH Yevropa Ittifoqidan Rossiya Ukrainaga tovon to‘lamaguncha mablag‘larga tegmaslik kafolatini talab qilmoqda. Yevropa Ittifoqi, o‘z navbatida, bu talabni bajara olmaydi. Politico buning uchun Yevropa Ittifoqiga aʼzo barcha davlatlarning roziligi kerakligini yozmoqda.
Izoh (0)