Tashqi ko‘rinishdagi muammolar kayfiyatga ta’sir qiladi. Bundan tashqari, ko‘zgu qarshisida beso‘naqay qomatni ham, xunuk tabassumni ham ko‘rish bir xilda yoqimsiz. Ammo ma’lum bo‘lishicha, bu muammolar bir-biri bilan bog‘liq.
Nahotki, tishlar bilan oshqozon-ichak salomatligi va vazn ortishi o‘zaro bog‘liq? Ha, shunday! Ovqatni to‘g‘ri chaynash uning normal assimilyatsiyasiga va organizmga berishi mumkin bo‘lgan barcha kerakli mikroelementlarni iste’mol qilishga bevosita ta’sir qiladi. Tish-jag‘ tizimi shunday tashkil etilganki, chaynash paytida yuk teng taqsimlanadi. Bu oziq-ovqatning yaxshilab maydalanishi va tupukning yetarli darajada ishlab chiqarilishini ta’minlaydi.
Tish bilan bog‘liq muammolar mavjud bo‘lsa, odam luqmani og‘riyotgan yoki chaynash noqulay bo‘lgan tomonda chaynamaslikka harakat qiladi. Yukning taqsimlanishi va chaynash sifati, tupuk ishlab chiqarish buziladi, oziq-ovqat yetarli darajada maydalanmaydi. Bunda oshqozon-ichak trakti yoki ovqatlanishning buzilishi bilan bog‘liq muammolar yuzaga chiqadi, bu esa vazn ortishiga olib keladi.
Fiziologik
Milkning qonashi, undagi og‘riq, yallig‘lanish ovqatni samarali chaynashga imkon bermaydi. Bu odamlar qattiq ovqatlardan voz kechishga, yumshoq ovqatlarni afzal ko‘rishlariga olib keladi. Ularni yeyish yanada osonroq, lekin aksariyat hollarda kaloriyalari yuqori va yopishqoq bo‘lib tish orasidagi bo‘shliqda qoladi va patogen bakteriyalarning ko‘payishini qo‘zg‘atadi. Bu og‘iz bo‘shlig‘i holatiga salbiy ta’sir qiladi. Bundan tashqari, milk va tish yuzasini tabiiy tozalab bo‘lmaydi, chunki buni qattiq oziq-ovqat mahsulotlari tabiiy ravishda bajaradi.
Chaynash sifatining pastligi oshqozon-ichak traktining turli kasalliklariga sabab bo‘ladi: gastrit, kolit va hatto, oshqozon yarasi kabi. Bu omillarning barchasi tufayli vazn ortadi va sog‘liq yomonlashadi.
Psixologik
Ba’zi tishlarning yo‘qligi yuz assimetriyasining paydo bo‘lishi, ajinlar va burun-lab burmalari chuqurlashishiga olib keladi. Oynaga qaragan odam bu ko‘rinishlarni qarilik belgilari, deb hisoblaydi. Tashqi ko‘rinishidan norozi bo‘ladi. Bu, ayniqsa, ayollar uchun stressdir. Ko‘pincha ular buni nimadir yeyish orqali yengib o‘tishga harakat qiladi.
Ammo bu xatti-harakat asta-sekin odat tusiga kiradi, vazn ortadi. Ko‘pincha esa og‘iz bo‘shlig‘i salomatligini yaxshilash, yetishmayotgan tish bo‘linmalarini tiklash kifoya va tashqi ko‘rinish ham o‘zgaradi. Og‘iz burchaklari ko‘tariladi, burun-lab burmalari kichrayadi, yuz yanada jozibali ko‘rinadi.
Nima qilish kerak?
Muammolarga duch kelmaslik uchun muntazam ravishda gigiyena muolajalarini bajaring va oziq-ovqat sifatini kuzatib boring:
- Tishlaringizni kuniga 2 marta yuving;
- Qo‘shimcha qurilmalardan foydalaning (tish iplari, irrigatorlar);
- Muntazam ravishda tish shifokorida ko‘rikdan o‘ting va muammoli tishlarni o‘z vaqtida davolang;
- Tishlaringizni kamida 6 oyda bir marta professional tozalang;
- Qattiq oziq-ovqat iste’mol qiling, fastfud, gazli ichimlik va shirinliklardan saqlaning;
- Tananing suv balansini to‘ldirish uchun ko‘proq toza suv iching, suv tish emalini yuvadi va himoya qiladigan so‘lak ishlab chiqarishga yordam beradi.
Izoh (0)