Hindistonda g‘avvosga to‘lov qilinguncha amaldor cho‘kib ketdi

Hindistonda g‘avvos qutqaruv xizmati uchun to‘lov olgunga qadar Gang daryosida amaldor cho‘kib ketdi. Bu haqda The Times of India xabar berdi.

45 yoshli Aditya Vardxana Singxa Uttar Pradesh shtati sog‘liqni saqlash departamenti direktori o‘rinbosari hisoblanadi. U 31-iyul kuni kunduzi do‘stlari bilan daryo bo‘yida dam olgan. Yaxshi kadr olish maqsadida u va uning do‘stlari qayiqda suzish tavsiya etilmagan hududga o‘tgan. Ammo suratga olish vaqtida erkak sirg‘anib ketib, suvga tushib ketgan.

“U suzishni bilar edi, lekin uni kuchli oqim olib ketdi”, deydi mutaxassislar.

Qidiruvga nafaqat qutqaruvchilar, balki politsiya va xususiy g‘avvoslar ham qo‘shilgan. 2-sentyabr kungi ma’lumotlarga ko‘ra, erkakni topishning imkoni bo‘lmagan.

Adityaning do‘stlariga ko‘ra, amaldor daryoga qulab tushganida g‘avvoslar 10 ming rupiy (taxminan 119 dollar) to‘lamaguncha uni qutqarishdan bosh tortgan.

“Naqd pul yo‘qligini aytganimizda ular onlayn to‘lov talab qildi. Pul tushganida va g‘avvoslar suvga tushgan vaqtga kelib, Adityani allaqachon oqim olib ketgandi”, deydi amaldorning do‘stlari.

Rasmiylar g‘avvoslar go‘yoki katerga yonilg‘i uchun pul so‘raganini aytmoqda.

“Agar ayblovlarda zarracha haqiqat bo‘lsa, g‘avvoslarga qarshi qonuniy choralar ko‘ramiz”, deydi politsiya.