Nanayga “Turizm qishlog‘i” maqomi berildi

Namangan viloyatining Yangiqo‘rg‘on tumanidagi Nanay qishlog‘iga “Turizm qishlog‘i” maqomi berildi. Mutasaddilarning qayd etishicha, bu Farg‘ona vodiysida ilk bor amalga oshirildi, deya xabar beradi “Daryo” muxbiri Azizbek Abduvaliyev.

Turizmni rivojlantirish, sayyohlarga munosib sharoit yaratish maqsadida oxirgi 5 yil davomida qishloqda 150 dan ortiq mehmon uyi, 2 ta hostel, 15 umumiy ovqatlanish maskani tashkil etildi.

Joriy yilning o‘zida 18 ta turizm obyekti barpo etilib, 300 dan ortiq ish o‘rni yaratildi. Osma ko‘prik va dor yo‘li foydalanishga topshirildi.

Nanayga joriy yilning 8 oyi davomida 20 mingga yaqin xorijiy, 220 mingdan ortiq mahalliy sayyohlar keldi. Hozirgi kunda qishloq hududida umumiy qiymati 30 million dollarga teng 87 ta loyiha amalga oshirilmoqda.

Qishloq hududidan oqib o‘tuvchi Podshootasoy qirg‘og‘ida 1,3 kilometr masofada salomatlik yo‘lakchalari bunyod etildi. Barpo etilgan ko‘plab sunʼiy sharsharalar esa qishloq jozibasini yanada oshirdi.

Nanayda bo‘lib o‘tgan tadbirda Turizm qo‘mitasi raisi o‘rinbosari Sardor Niyazov, viloyat hokimi o‘rinbosari Botir Nuriddinov va jamoatchilik vakillari ishtirok etdi. Tadbirda Turizm qo‘mitasi tomonidan Nanayga “turizm qishlog‘i” maqomi berilgani eʼlon qilindi.