Amerikalik milliarder Ilon Mask Qo‘shma Shtatlar tezlik bilan inqirozga yaqinlashayotganini va bunga inflyatsiyaning o‘sishiga olib keladigan haddan ortiq xarajatlar sabab bo‘layotganini ma’lum qildi.
![](/static/2024/08/30/photo_2024-08-30_18-42-27-uGqRW6wi.jpg)
Shu tariqa Mask X ijtimoiy tarmog‘idagi foydalanuvchining AQSH rasmiylari 2035-yilga borib mamlakat davlat qarzini yana 16 trillion dollarga oshirishni rejalashtirayotgani haqidagi postiga javob qaytargan.
“Hukumat xarajatlarining hozirgi sur’atida Amerika tezlik bilan bankrotlikka yaqinlashmoqda”, deb yozgan Mask o‘zining X ijtimoiy tarmog‘idagi sahifasida.
Avvalroq AQSH Kongressining Byudjet byurosi o‘z hisobotini e’lon qilgan edi. Unga ko‘ra, 2034-yilga borib AQSHning davlat qarzi 50,7 trillion dollarga yoki mamlakat yalpi ichki mahsulotining 122 foiziga oshadi. Shuningdek, AQSH byudjeti taqchilligi 2024-yilda 1,9 trillion dollarni tashkil etadi va 2034-yilga kelib 2,8 trillion dollarga yetadi.
AQSHda so‘nggi yillarda ijtimoiy taʼminot va sog‘liqni saqlash sohasiga davlat yordami hajmi ortgan. Mamlakatda foiz stavkalari muntazam oshib bormoqda. Bu holatlar esa mamlakat moliyasi uchun og‘irlik qilmoqda.
Demokratlar ham, Respublikachilar ham milliy qarz haqida xavotir bildirgan. AQSH hukumati bunday og‘ir sharoitda ijtimoiy xarajatlarni qisqartirish yo‘lidan borishi mumkinligi taxmin qilingan. Chunki mamlakatdagi ko‘p sonli keksalar hamda nogironlik nafaqasini oluvchilar davlat byudjetining katta ulushini o‘zlashtirmoqda.
Izoh (0)