Ukrainaga berilgan F-16 qiruvchi samolyotlaridan biri halokatga uchradi

Ukraina Qurolli kuchlari Bosh shtabi F-16 samolyoti yo‘qotilganini tasdiqladi.

26-avgust kuni Rossiya hujumini qaytarishda Ukraina Qurolli kuchlarining F-16 qiruvchi samolyotlari qatnashgan. Maqsadli hujum paytida samolyotlardan biri bilan aloqa uzilib qolgan.

Bu haqda Ukraina OAVlari Ukraina Qurolli kuchlari Bosh shtabi bayonotiga tayanib xabar berdi.

“Havo jangi paytida F-16 samolyoti o‘zining yuqori samaradorligini namoyish etdi, bort qurollari bilan dushmanning to‘rtta qanotli raketasi urib tushirildi. Ammo keyinroq samolyotlardan biri bilan aloqa uzildi. Tekshirishlar samolyot halokatga uchragani va uchuvchi halok bo‘lganligini tasdiqladi. Mudofaa vazirligining samolyot qulagan hududda ish olib borayotgan maxsus komissiyasi avariya sabablarini aniqlashga harakat qilmoqda”, deyiladi xabarda.

Avvalroq Ukrainaga topshirilgan F-16 samolyotlari Amerika raketalari bilan jihozlanishi xabar berilgandi.